تشيز كيك ستيكس
النهاردة هنعمل تشيز كيك ستيكس، تخيل كدة صوابع تشيز كيك و تغطيها بالتوبينج اللى تحبه .. تعالى احكيلك.
المقادير
- ١٥٠ جرام بسكوت
- ٥٠ جرام زبدة
- ١٠٠ جرام جبنة كريمى (٧ مكعبات)
- معلقتين كبار سكر بودرة
- ٢٠٠ مل كريمة حلويات
- ڤانيليا (تاج الملوك)
طريقة التحضير
هنفرم البسكوت و نقلبه مع الزبدة السايحة و نجيب قالب سيليكون كدة شبه ده يكون على شكل صوابع و نحط فيه طبقة البسكوت الاول و نساويها بحيث نعمل فجوة كدة للجبنة، ندخل البسكوت الفريز ساعة كدة.
فى بولة هنضرب الجبنة مع السكر بعد كدة نضيف الكريمة و الفانيليا و نضرب كله مع بعض.
هنطلع البسكوت من الفريزر و نحط عليه الكريمة و ندخله تانى الفريزر يفضل ليلة كاملة.
بعد كدة بقى نطلعه و نغرقه بصوص الشوكولاتة او اى صوص تحبوه، جربوا التشيز كيك ستيكس و قولوا لنا رأيكم 😍😍😍
