ميني خبز رمضان
يسعد اوقاتكم يا رب كثير منا بعمل خبز رمضان كرغيف كامل انا حبيت اعمله ميني ليكون مشجع للاكل وحشيته بحشوة الاجبان والعجين روعة لازم تجربوها
ميني #خبز_رمضان (لينا عرار)
بنذوب:
- ٢ م ك خميرة
- كوبين الا ربع حليب سائل دافئ (اكثر او اقل حسب نوع الطحين)
- ثلاث معالق كبيرة سكر
وبنتركهم خمس دقائق لتتفاعل الخميرة.
بنعجن :
- ٤ اكواب طحين
- معلقة كبيرة ملح
- بعدها بنضيف الحليب مع الخميرة وبنحركهم سوا و
- اخر شي بنضيف ربع كوب زيت زيتون او نباتي
لحتى تتشكل معنا عجينة طرية ، بنحط اسفلها رشة زيت وبنغطي العجين وبنتركها تخمر نصف ساعة.
بعد لتتخمر بنفرد العجين بشكل دائري وبنحشيها باي حشوة بتفضلوها وبالشوكة بنحدد الاطراف وبنعمل مربعات بالوسط وبندهن الوجه (صفار بيضة مخفوقة مع ٢ م ك حليب سائل ورشة خفيفة نسكافية) وبنرش ع الوجه سمسم وحبة البركة (القزحة).
بنغطي العجين وبنتركها ترتاح نصف ساعة بعد هيك بنرجع بنحدد الاطراف والوسط وبندخلها ع فرن محمى مسبقا ع حرارة ٢٠٠ بتوخذ حوالي من عشر دقايق لربع ساعة مع المراقبة
بنغطي الخبز بفوطة رطبة لمدة عشر دقايق بعد لتطلع من الفرن وصحة والف هنا.
