النهاردة هنعمل اختراع خطير اوى اوى، هنعمل سندوتشات جبنة رومى مقلية .. تعالوا هحكيلكوا.
المقادير
- جبنة رومى (يفضل شرايح سميكة شوية)
- بيض
- دقيق
- بقسماط و هنخلط معاه ڤيچيتار من (كنور)
- زيت
- عيش فينو
- جرحير
- بسطرمة
- طماطم.
طريقة التحضير
هنجيب شريحة الجبنة الرومى نحطها فى البيض، بعد كدة فى الدقيق بعد كدة فى البيض تانى بعد كدة فى البقسماط مع الڤيچيتار.
نسخن الزيت و بعد كدة ننزل الحرارة لمتوسطة و ننزل الجبنة لحد ما الطبقة اللى بره تاخد لون دهبى نطلعها على طول.
عيش فينو بقى من الحلو بتاع الفرن و نحط فيه جرجير و طماطم و الجبنة الرومى المقلية الخطيرة و شرايح بسطرمة 😍
هتاكل سندوتش خطير مليان نكهات و بجد سهل و فكرته جديدة .. جربوه و قولوا لنا رأيكم 😍
