النهاردة أنا عامل لكم حتة وصفة أنا أزعم إنها من أفضل الوصفات من حيث الطعم و الشكل طبعاً، ال(سبايسى تشيكن رانش بيتزا ديب) إختراع كدة سريع و طعمه حلو و وجبة تتنقنق قدام التلفزيون كدة.
المقادير
- ٤٠٠ مل كريمة طهى
- ١٠ حبات جبنة كريمى او ٢٠٠ جرام من اى نوع جبنة كريمى
- ٥٠ جرام (كوباية صغيرة) جبنة بارميزان (ممكن تستغنى عنها بس هتفرق فى الطعم)
- ٢٠٠ جرام (كيس) موتزاريلا
- صوص رانش
- صدور فراخ
- بصل احمر
- هاليبينو
طريقة التحضير
بنشوح الفراخ مع ملح و فلفل و زعتر فى شوية زبدة الأول لحد ما ياخدوا لون.
نسخن الكريمة لحد ما تتقل شوية نضيف عليها الجبنة الكريمى تكون بدرجة حرارة الغرفة و نقلبها كويس لحد ما تتقل و تندمج مع الصوص نضيف بعدها البارميزان بعد كدة الموتزاريلا و نقلب لحد ما تبقى تقيلة شبه العجينة كدة.
بعد كدة نفردها على الطاسة أو الحاجة اللى هندخلها الفرن و نحط على الوش صوص الرانش و عليه الموتزاريلا و نختم بالفراخ و البصل و الهاليبينو، نروح على الفرن ٥-٧ دقايق.
لما تطلع نديها شوية رانش من فوق و نكون محمصين عيش فى الفرن من قبلها و نبدأ ناكل الإختراع العالمى ده….. بالهنا و الشفا. جربوها و قولوا لنا رأيكم 😍
