《كوكيز بالشوكولاته والزبدة البنية》
هذي الكوكيز مختلفه عن اي كوكيز انا سويتها .. لييش ؟؟
لان الزبدة المستخدمه حطيتها بتاوة او مقلى وذوبتها وعلى نار هادية حركتها باستمرار .. واول مابدأت تتحول للون البني رفعتها وصبيتها مباشرة بطبق وخليتها بالثلاجه ترد تجمد وعقب استخدمتها بالوصفه
لاتتخيلون النكهه تنقلب مليون درجه شلون .. شي خطير .. كل الخوف انكم تحرقون الزبدة .. انتبهوا
واذا طلع منها شوائب عادي نصفيها وعقب نبردها .. طبعا ممكن تستخدمون زبدة بدون تقليبها .. بس عاد يعني لاتتكاسلون .. ترى تستاهل و #لذيذة_لذاذة_اللذوذين_كلهم😋👌
المقادير
- اصبعين زبدة بنية يعني ٢٠٠جرام
- ٢ وثلث كوب طحين ابيض ممكن توصل لكوبين ونص حدهاا
- كوب سكر بني
- نص كوب سكر ابيض
- حبتين بيض وشوية فانيلا
- م.ص كربونات صودا
- ربع م.ص ملح عادي او نص م.ص ملح بحري خشن
- كوب حبيبات شوكولاته
- اختياري نص كوب جوز بيكان مجروش
#كوكيز_كلحه
طريقة التحضير
🔸جهزوا صينية قصيرة الحواف ومفروشه ورق زبدة
🔸يحمی الفرن مسبقا 180 درجه
🔸اخلطوا النواشف بطبق منفصل وهم الطحين والصودا والملح
🔸بالخلاط الكهربائي ركبو شبك التقليب وليس الخفق واخلطو الزبدة حوالي دقيقتين حتى يصبح كريمي مع مراعاة مسح الحواف اذا علق فيها الزبده ونكمل خفقها
🔸نضيف السكر النوعين ونخلط حوالي 3 دقايق حتی يصبح قوامه كريمي متجانس
🔸اضيفوا الفانيلا والبيض بالتدريج يعني حبه نخلط وبعدها نضيف البيضه الثانية واستمرو بالخلط
🔸الان اضيفوا النواشف واخلطوا بالملعقه باليد حتی يتجانسو ومافي مشكله لو بالخلاط يساعدكم بالخلط
🔸اضيفو قطع الشوكولاته والجوز واخلطوها بالملعقه حتی تتداخل بالمزيج
🔸صبوا بالصينية مقدار كرة صغيرة (الافضل استخدام ملعقه الايس كريم)
🔸خلوهم بعيدين عن بعض حوالي انش … وبالفرن حوالي 15 دقيقه الى 20 دقيقه فقط ويمكن اكثر بدقيقتين مثلا
🚩 انتبهوا لان اكثر الناس تفشل معهم لما يشوفون الكوكيز طرية من فوق عبالهم ما استوت وساعتها تحترق من تحت .. راقبوا قاع البسكوت بس يشقر طلعو الصينيه علطووول وبالعااافيه😊
#٢٠١٨_كلحه
