النهاردة هنعمل أحلى مكرونة بكباب الحلة، وصفة بجد اللى مش هيعملها هيفوته كتير اوى … يلا بينا.
المقادير
- نص كيلو لحمة سن كندوز قطع
- سمنة
- بصلتين كبار
- ملح، فلفل
- ورق لورا، حبهان
- خلطة ال١١ بهار الخطيرة من (كنور)
- طماطماية.
طريقة التحضير
فى طاسة او حلة سخنة هننزل بالسمنة عليها اللحمة و اول ما تدخل فى السوا ننزل عليها بالبصل بعد كدة الملح و الفلفل و ورق اللورا و جوزة الطيب و اخيراً ال١١ بهار و طماطم مضروبة نص ضربة كدة، بعد كدة نضيف المياه السخنة، مش كمية كبيرة، نوطى النار و نغطى.
بعد ما وطينا النار و غطينا عليها و سيبناها اقل حاجة ساعة نفتح عليها و هنشم احلى ريحة فى الحياه، ممكن بقى ناكل كباب الحلة ده مع ارز بالشعرية بس تعالى نعلى الموضوع و نعمله بالمكرونة.
هنجيب مكرونة مسلوقة و ننزل بيها على الكباب و نقلب كويس، ممكن ناكل من هنا.. و ممكن نضرب شوية موتزاريلا على الوش و ندخلها الفرن مع الشواية هتعمل احلى شغل جداً بقى 😍👍🏻
جربوا الوصفة دى هتعجبكم جداً، سهلة و الطعم بجد مش ممكن فى حلاوته، جربوها و قولوا لنا رأيكم 😍
