النهاردة هنعمل بشاميل الخميس، بس مش هنعمل مكرونة، هنعمل شوية مسقعة ملهمش حل …. يلا بينا
المكونات والمقادير
- بتنجان
- بطاطس
- فلفل
- نص كيلو سجق
- ٤ طماطم
- بصلة
- معلقة كبيرة ثوم مفروم
- كوباية صوص طماطم
- معلقة كبيرة صلصة
- معلقة صغيرة سكر
(مقادير البشاميل)
- معلقة كبيرة سمنة
- معلقتين كبار دقيق
- لتر لبن
- ملح، فلفل، زعتر، مكعب مرقة، بشرة جوزة الطيب
- معلقة كبيرة قشطة
طريقة التحضير
هنقلى البتنجان و البطاطس و الفلفل اولاً و نسيبهم على جنب.
فى طاسة هنشوح السجق مع البصل و الثوم و قرن فلفل حامى و ننزل بالطماطم المعصورة و صوص الطماطم و السكر و نسيبهم يتسبكوا.
هنعمل بقى البشاميل، نسيح السمنة و نقلب فيها الدقيق كويس جداً بعدين ننزل باللبن و نبدأ فى التقليب لحد ما القوام يربط، ننزل بالتوابل بقى و القشطة.
نرص الصينية بالترتيب اللى فى الڤيديو ده و نغطى الوش بالبشاميل و الموتزاريلا و شوية زيت بعد كدة نطلع على الفرن و بعد كدة الشواية.
هتاكل احلى صينية مسقعة بالبشاميل و السجق كمان عامل معاها شغل عالى اوى اوى، جربوها و قولوا لنا رأيكم 😍
