وصفة كوكيز التشوكلت:
الوصفة اخذتها من كيس رقائق ريزيس (رقائق الفول السوداني) بس غيرت فيها اغلب المقادير وضفت سكر بني من اختياري وحولتهم للجرام للي يفضلون استخدام الميزان وانا افضله بعد لان يعطي نتيجه مضبوطه:
المقادير
- ١ كوب (١٦٥ جرام) سكر بني
- ٢/١ كوب (١٢٠ جرام) سكر ابيض
- ١٨٠ جرام زبده ، بحراره الغرفه
- ١٠٠ جرام او ٢ حبه بيض
- ١ ملعقة صغيرة فانيلا
- ٢ كوب + ١ م ك (٣٠٠ جرام) طحين
- ١ ملعقة صغيرة بيكنق صودا
- ٢/١ ملعقه صغيرة ملح
- ٤/٣ كوب (٦٠ جرام) ككاو بودر (المر)
طريقة التحضير
١- نسخن الفرن على حراره ١٨٠ سيليزي او ٣٥٠ فهرنهايت. الرف بالوسط والحراره من تحت فقط. مع مروحه او بدون مروحه عادي. لازم الفرن يسخن قبل خبز الكوكيز عالاقل ب١٠ دقايق. (يفضل صينيه الفرن تكون فاتحه يعني سلفر او ذهبي مو اسود ، لان اللون الغامق يمتص الحراره اسرع ويتحمر من تحت زياده ومن داخل مايكون مستوي عدل .. وهالنقطه ذكرتها في بوست تعليمات الكوكيز).
٢- في الخلاط نخلط السكر الابيض والبني مع الزبده، بعد مايتجانس الخليط ، نضيف البيض بالتدريج والفانيلا ونخلط الخليط دقيقه او دقيقتين لين مايتجانس بس.
٣- في وعاء اخر نخلط الطحين والبيكنق صودا والملح والككاو البودر مع بعض ، وعلى دفعتين نضيف خليط الطحين الى خليط السكر والزبده ونخلط لمده دقيقتين تقريبا الى ان ينخلط الطحين تماما مع الخليط. .
٤- نضيف رقائق التشوكلت على الخليط ونخلط قليلا.
في الفيديو انا قسمت خليط الكوكيز وضفت على نصه رقائق الفول السوداني والنص الثاني مع رقائق التشوكلت.
تقدرون تضيفون اي رقائق تحبونها سواء تشوكلت او فول سوداني او ممكن اضافه قطع ككاو مثل قلكسي او كندر.
٥- نكور الكوكيز باليد او بملعقه الايس كريم الصغيره. نصفهم في الصينيه ونترك بين كل قطعه والثانيه مسافه ٢ انش تقريبا. ندخله الفرن ويخبز لمده ٨ الى ١٠ دقائق فقط.
(شكل الكوكيز يكون مو مستوي بالبدايه اول مانطلعه من الفرن بس بعد مايبرد يتغير .. اهم شي يكون متحمر شوي من تحت)
بعد مانطلعه من الفرن نخليه يبرد في الصينيه ١٠ دقائق.
