كبه بالصينيه .
الشرح المفصل
كبه بالصينيه : ٣ اكواب برغل اسمر ناعم – كوب مي لنبل البرغل – نصف كيلو لحم عجل مفروم ناعم مع شقفة ليه – نصف كيلو لحم غنم مفروم عالناعم .
٦ بصلات وسط .
منبل البرغل بالمي وبس ينشف منرش رشات خفيفه مي
بس يطرى البرغل منعمل تحويجه خضرا ( معلقتين برغل ناشف اسمر ناعم مع بصله كبيره ونعنع شوي و ٣ معالق كبار تحويجه و فلفل حر و رشة ملح ) منفرمن عالمولينكس بيطلع عنا مزيج لونو اخضر منخلطو مع البرغل واللحمه المفرومه عالاخر واضح شكلها بالفيديو .
مندعكن مع بعض دعك يعني خلط بكفوف الإيد .. منحط حدنا كاسة مي متلجه كل ما نحس شدت العجينه منحط شوية مي عئيدينا و منكفي دعك ( اذا في ماكينة لحمه اسهل من الإيد بتنزلو البرغل و اللحم و التحويجه الخضره بماكينة اللحم بالشفره الناعمه .بسير عنا عجينة الكبه منقسمها نصين ..
قطعنا البصل وقلينا بزيت البصل قلينا اللحمه و ضفنا عاللحمه بس ستوت صنوبر مقلي و لوز مقطع مقلي و البصل و ملح و معلقة تحويجه كبيره .
بس نخلص عجينة الكبه منفردها و منحط بصينة زيت و سمنه ( سمن) و منمد اول طبقه بتكون اسمك من يلي فوف .
منحط الحشوه بالنص .
منحط الطبقه التانيه .
منقطعها خطوط بالطول بعدين من وسط الصينيه منبلش نقطع عكس الخطوط واضح بالفيديو بتطلع ارتب بس كنت عم صور .
منحط حبوب اللوز الكامله ولازم نغرزها بالكبه لازم احسن ما تحترق .
منضغطها بكل معين كبه ♦️♦️♦️
منحط عالوج سمن – زيت – زيت زيتون .
الكميه شوي شوي بس لازم تكون ظاهره نسبة الزيت عالوج عشان لا تطلع ناشفه .
منحطها بالفرن من تحت بس تتحمر الاطراف منطفي من تحت و منحمرها من فوق .
منرجع منقطعها نفس الرسمه ومنتركها تبرد شوي عشان تجمد .
التحويجه ( هي مجموعة بهارات ) خاصه بالكبه سواء كانت كبه نيه او أقراص كبه او كبه بالصينيه او كبه مشويه
مكونات كيلو التحويجه : نص كيلو كمون حب/ ١٠٠ غرام فلفل حلو /١٠٠ غرام فلفل اسود/١٠٠غرام نعنع يابس /٥٠ غرام فلفل حر احمر/ مردكوش ١٠٠ غرام/ درسين عيدان ١٠٠ غرام /حبتين جوزة الطيب/ كمشة ورد يابس متل يلي بزينو في المهلبيه
منطحن الكمون بعدين والفلفل الحلو بعدين والفلفل الاسود و القرفه ( درسين) و جوزة الطيب
يعني كل نوع منطحنو لحالو
النعنع اليابس بئيدنا و المردكوش اليابس بئيدنا والورد اليابس عئيدنا
نخلط كل انواع البهار وبسير عنا خليط بهار اسمو تحويجه
