النهاردة عندنا وصفة صيفية خطيرة، فطير … بس مقلى و كور صغيرة و طعمه عالمى … يلا بينا
المقادير
- كيلو دقيق
- نص لتر مياه
- معلقة كبيرة ملح
(الحشو حسب المزاج، انا حطيت تركى مدخن و لحمة مدخنة و موتزاريلا و شيدر احمر)
هنحط الملح على المياه و نقلبه، بعد كدة هنجيب الدقيق و نحطه فى العجان و نحط عليه المياه بالملح و نسيبه يعجن لمدة ٥ دقايق كدة، لو مفيش عجان نعجن بإيدنا لمدة ١٠ دقايق مثلاً.
هنقسم العجينة كور و نحط عليهم زيت نغلفهم بالزيت كدة و نحطهم جنب بعض فى طبق و نغطيهم و نسيبهم يرتاحوا ساعة.
ندهن السطح اللى هنشتغل عليه بزيت و نحط العجينة و نضغط عليها بإيدنا بعد كدة نفرد كويس بالنشابة و نبدأ نشدها بإيدنا لحد ما تبقى رفيعة جداً نقطعها زى الڤيديو كدة.
نبدأ بقى نحشى بالطريقة اللى فى الڤيديو كدة على شكل كور صغيرة بس نتأكد إننا مرفعين العجينة على الاخر علشان ميبقاش فيها عجين كتير 👌🏻
نسخن الزيت و نقلى بقى الكور بتاعتنا لحد ما يبقى لونها دهبى و تبقى مقرمشة كدة 😍😍
قدموها بقى و هتاكلوا احلى كور فطير مقلية مقرمشة و الجبنة جواها سايحة و خطيرة … جربوها و قولوا لنا رأيكم 😍
