فطيرة التفاح و فطيرة الكاسترد و الفراولة
النهاردة هنعمل حاجة خطيرة بنجيبها من بره و بجد تجربة ناجحة جداً (فطيرة التفاح) و (فطيرة الكاسترد و الفراولة) .. يلا بينا ….
بالنسبة للتفاح:
- ٤ تفاحات متقطعين مكعبات صغيرة
- ٣ معالق كبار سكر بنى
- ٣ معالق كبار سكر ابيض
- رشة قرفة
- عصرة ليمون
- معلقة صغيرة نشا عليها ربع كوباية مياه
طريقة التحضير
نحط فى الطاسة التفاح مع السكر و نسخنهم الأول بعد كدة نضيف القرفة و عصرة الليمون و النشا مع المياه و نسيبهم على نار هادية كدة لحد ما كل المكونات تتداخل مع بعض.
هنجيب بقى عجينة الباف بيسترى و نفردها شوية و نقسمها من النص، نحط التفاح فى جزء و نقفل عليه الجزء التانى و بالشوكة نقفل كويس و نشيل الأطراف الزيادة.
هنعمل واحدة تانية بالكاسترد و مربى الفراولة و نكرر نفس الحاجة و مدخلهم الفريزر حوالى ساعة.
فى زيت غزير بقى هننزل الفطاير بتاعتنا لحد ما تاخد اللون الدهبى الخطير و نروح مطلعينها.
بجد طعمها تحفة و تجربة ممتعة و مخدومة اكتر كمان من بتاعة بره .. جربوها و قولوا لنا رأيكم 😍
