النهاردة هنعمل الوصفة اللى أنا شخصياً مكنتش متخيل إنها تعجبكوا كدة 😍 شوربة الكريمة بالمشروم … يلا بينا
المقادير
- ربع كيلو مشروم (أنا استخدمت المشروم الأبيض و البورتوبيللو، انتوا استخدموا المتاح، يفضل جداً الفريش مش المعلب، بس لو مفيش غير المعلب مش ازمة و لو عايزين تزودوا الكمية عادى)
- ٥٠ جرام زبدة
- معلقة صغيرة ثوم مفروم
- معلقة كبيرة دقيق
- ٥٠٠ مل شوربة (مكعب و نص مرقة مع ٥٠٠ مل مياه)
- ٥٠٠ مل كريمة
- ملح، فلفل، جوزة الطيب، أوريجانو (أو زعتر)
- رشة بقدونس
طريقة التحضير
فى طاسة هنحط زبدة و نشوح فيها المشروم، بعد كدة نشيل المشروم على جنب و فى البهاريز هننزل بالدقيق و الثوم و نقلب لحد ما الدقيق يدوب تماماً نروح نازلين بالشوربة و نقلب شوية و بعد كدة ننزل الكريمة و نقلب كله مع بعضه، بعد كدة المشروم هيكون نزل مياه و هو على جنب هنرجعه الشوربة هو و المياه بتاعته و نختم برشة بقدونس و دى اختيارى.
هنجيب بقى ٥٠ جرام زبدة نسيحهم و نديهم معلقة ثوم مفروم و رشة بقدونس و نجيب عيش توست نعمله مكعبات و ندهنه و ندخله الفرن لحد ما يحمر
نقدم بقى الشوربة و نحط عليها رشة (تشيلى فليكس) و رشة بقدونس و انا بحب معاها نص ليمونة بصراحة و ادينى معاها بقى العيش بالزبدة و الثوم المحمص و اضرب احلى شوربة كريمة هتاكلها فى حياتك، جربوا الوصفة بالمقادير المظبوطة و قولوا لنا رأيكم 😍😍
