سندوتشات جمبرى و سبيط بالطريقة الشعبى
النهاردة هنعمل سندوتشات جمبرى و سبيط بالطريقة الشعبى، جمبرى و سبيط مينفعوش من غير طحينة، هنعمل أحلى سلطة طحينة بإستخدام طحينة البوادى … يلا بينا.
المقادير
- نص كيلو جمبرى
- نص كيلو سبيط
- ٣ ليمون
- معلقة كبيرة ثوم مفروم
- ملح، فلفل، بابريكا، كمون، كسبرة
(خليط الدقيق)
- كوبايتين دقيق
- معلقة كبيرة نشا
- معلقة كبيرة كركم
هنحط الليمون عليه الثوم و التوابل بتاعتنا و نقلبهم مع بعض و نحط الجمبرى، و نعمل تتبيلة تانية بنفس المقدار للسبيط و نسيبهم شوية فى التتبيلة.
بعد كدة هنطلعهم من التتبيلة نحطهم فى خليط الدقيق و نقلبهم فى الدقيق كويس جداً بعد كدة ننزل بيهم فى الزيت يتقلوا كويس و نطلعهم.
(سلطة الطحينة)
- كوباية طحينة (البوادى)
- ملح، فلفل، كمون، بابريكا، زعتر
- معلقة صغيرة ثوم مفروم
- نص كوباية مياه
- ربع كوباية خل
- ليمونتين
هنخلط كل المكونات ببعض نطلع احلى سلطة طحينة.
هنجيب رغيف العيش البلدى نعمله جيب و نحط سلطة طحينة و نحط عليها جرجير و نحط الجمبرى او السبيط و نديه شوية كمان من الطحينة من فوق.
نقدم بقى مع طحينة زيادة و خيار مخلل و ليمون معصفر و هناكل احلى سندوتشات جمبرى و سبيط، جربوا الوصفة و قولوا لنا رأيكم 😍
