| خبز البراتا بحشوة البطاطس 🥔|
هذي الطريقه صلحتها بدقيق الچباتي والبوست اللي بعده دمجت بين الأسمر والأبيض فإذا عندك دقيق الچباتي صلحي هذي الطريقه مره بطله ومضبوطه .. أخذته هذا الدقيق من الدانوب وإذا ماعندك صلحي الطريقه الثانيه 👈🏻
بسم الله نبدأ الوصفة أول شيء نصلح العجينة :
3 أكواب دقيق الچباتي
م ص ملح
3 م ك زيت
الماء نضيفه بالتدريج لين تصير عندنا عجينه لينه ملمومه ما تلزق باليد سواء بالعجانه أو باليد .
بعدين نخليها ترتاح شوي مو تتخمر بس ترتاح على بال مانجهز الحشوة :
4 حبات بطاطس حجم وسط نغززها بالسكين
يعني نسوي فيها فتحات من كل الجهات وبعدين ندخلها للمايكرويف تقريباً 6-7دقايق وكل وحده تجرب مع مايكرويفها تبدأ تحط 5دقايق وتزيد الوقت دقيقه دقيقه لين يستوي ، نقشر البطاطس ونبشره بالمبشره بشر ناعم وهذي أفضل وأسرع طريقه للبطاطس للمهروس ،
في تاوه نضيف زيت زيتون مع ثوم مهروس وشوي زنجبيل مهروس جاهز أو طازج يصير نفرمه مع الثوم ونضيف البهارات وتكون مطحونه :
كركم ، فلفل أسود وأحمر ، شوي من بهارات الكاري اذا تحبون وشوي كمون .. ونحمسهم مع بعض لين تطلع ريحتهم وبعدين نضيف بصل أخضر مقطع شرائح + فلفل رومي أخضر وأحمر أو حار على حسب الرغبه .. نشوحهم بعدين نضيف البطاطس وآخر شيء بقدونس + كزبره + شبت .. بعدين نكور البطاطس كور متوسطه ونقطع العجينه لكور أكبر من حجم البطاطس بشوي بعدين نفرد العجينة على سطح مرشوش بالدقيق ونحط البطاطس بالنص ونقفل عليها العجينه مضبوط بعدين نبدأ نفرد بشكل خفيف لين تصير عندنا العجينه سمكها رفيع ثمن نحمّي الصاج أو التاوه ونحمر الخبزه على جهتين
مع الدهن بشكل خفيف بالزبده الذآيبه ✨ .
** الحشوه مو شرط بطاطس مهروس لو أجبان مشكّله أو أي شيء على حسب ذوقكم ♥️
#مخبوزات_عبير_العميرة
