حلا البف باستري بطريقة عبير العميرة 😍🍰🍓 بالأساس خذيت الطريقه من صديقتي العروسه الرقيقه (هنّو) 💁🏻 وعدّلت عليه لين صار بهالشكل 🙊 .
المهم إنه سهل وشكله فخم يوحي لكم إني تكلّفت فيه 😁
اللي يتابعني بالسناب يلاحظ إني صلحته المره الأولى فقط ببسكوت الداجستيف أما المره الثانيه حبيت أخلط أنواع من البساكيت وحسيته ألذذذ 😋👌🏻😍
المقادير :- راح اكتبها بالتفصيل نفس ماصلحت وأنتم نقصو وزيدو على راحتكم ..
- ١٣ حبة بسكوت داجستيف .
- ٨ حبات بسكوت أوريو وشلت الكريمه .
- ٢٠ حبة بسكوت لوتس .
- باكيت كامل بسكوت الجوزاء .
- اصبع زبدة ١٠٠ جرام .
- ٤ حبات مارس كبير .
- ٢ سنكرز كبير .
- علبة قشطة مثل: التاج وغيرها .
- علبة وحدة حليب مكثف محلّى حجم كبير.
- ٥ حبات جبن كيري .
- بف باستري ماركة السنبله ( استخدمت ٤حبات ) .
طريقة التحضير
١- نكسّر البسآكيت عشوائي ونحطهم بصينية مقاسها ٨ انش اذا تحبّون الطبقه تطلع عريضه .
٢- نذوّب الزبده على نار هاديه ونضيف عليها المارس والسنكرز لين يذوب وبعدين نضيف القشطة .
ونصبّه ع البسكوت ونحرّك بالملعقه شوي عشان يتغلغل مع البساكيت .
٣- نخلط بالخلاط النستله والكيري ونضيفه فوق الخلطه اذا تحبونه يصير ثقيل وطبقة واضحه زيدو حبات الكيري
٤- نكون محمّرين البف باستري ونكسّره فوق الحلا لين يتغطّى وندخله الفرن ونشغله من فوق بس يتحمر خفيف
٥- ندخله الثلاجه لين يبرد تماماً أقل شيء ساعتين .
وعند التقديم يجمّل حسب الرغبه أنا أضفت فراوله 🍓
وبس جعله بالعافيه 😍
ملاحظه :-
١- تقدرون تضيفون مع البساكيت بسكوت أولكر شوكو ساندوتش .
٢- ممكن تخلطون بساكيت مع قطع كيك .
٣- ممكن تضيفون توفي أو صوص لوتس .
٤- ممكن تكتفون بالمارس فقط بدون سنكرز .
٥- قبل التقديم الأفضل يكون طالع من الثلاجه ع الاقل نصف ساعه عشان يكون طرّي عند الأكل .
