فكرة جديدة ل#بشاميل_الخميس يلا بيناااااا 😍😍
هنجيب صدرين فراخ مسلوقين نفتفتهم و نحط عليهم جبنة كريمى حوالى ١٥٠ جرام و معاهم مشروم مفروم و جبنة موتزاريلا و نقلبهم مع بعض كويس جداً بحد ما يبقى خليط، الخليط لازم يبقى خفيف شوية زى المعجون كدة.
هنجيب كيس و نحط الخليط و نحشى بيه مكرونة نوعها كانيلونى و نعمل البشاميل بتاعنا و نرص الصينية طبقة بشاميل، طبقة مكرونة طبقة صوص طماطم و طبقة موتزاريلا و نكرر لحد ما نقفل بطبقة بشاميل و موتزاريلا.
(مقادير البشاميل)
- ٥٠ جرام زبدة
- معلقتين كبار دقيق
- نص لتر لبن
- نص لتر كريمة
(ممكن لتر لبن لو مفيش كريمة) - معلقة كبيرة جبنة كريمى
- ملح و فلفل و زعتر و جوزة الطيب و مكعب مرقة
ندخلها الفرن مقفولة بفويل و نسيبها على ١٨٠ لمدة ٤٥ دقيقة.
بعد كدة نشيل الفويل و نفتح الشواية نحمر الوش و نقدم بقى، طعمها حلو و ممكن نستبدل الفراخ بلحمة مفرومة مثلاً هتبقى خطيرة برضه، جربوا الوصفة و قولوا لنا رأيكم 😍😍
