البيتزا الشهيرة
النهاردة مش أنا اللى هطبخ، النهاردة هنبدل الأدوار، بابا اللى هيطبخ و أنا اللى هصور، بابا هيعمل البيتزا الشهيرة بتاعته، هى مش شبه أى بيتزا جربتوها فى حياتكوا و لكن هى عظيمة …. تعالوا نتفرج هيعمل إيه 😍
(مقادير العجينة)
- كيلو دقيق
- نص لتر مياه
- ٢ باكو خميرة
- نص كوب لبن
- ملعقة كبيرة زبادى
- ملعقة صغيرة سكر
- ملعقة صغيرة ملح
المياه مع الخميرة و السكر يخمروا الأول بعد كدة نحط كل المكونات مع بعض فى العجان و نعجن و بعد كدة نخرجها و نغطيها و نسيبها ساعة تخمر
(مقادير الصوص)
- ٤ ملاعق كبار صلصة
- نص كوب مياه
- ملح و فلفل و زعتر
بعد ما نعمل الصوص نسيبه يبرد، بعد كدة نفرد العجينة و نحط عليها الصوص و لحمة مفرومة و بسطرمة نكون مشوحينها و بصل و فلفل و مشروم مع الجبنة الموتزاريلا و هوبااا على الفرن.
البيتزا دى اختراع يا شباب و اديها موتزاريلا تديك نتايج احلى … جربوها و قولوا لنا رأيكم 😍
