النهاردة هنعمل وصفة .. اختراااع و فى حلة واحدة، هنعمل الارز المتدلع .. تعالوا اقول لكم هندلعه ازاى … يلا بينا
المقادير
- ٣ كوبايات ارز بسمتى
- ٤،٥ كوبايات مياه
- بصلاية مفرومة
- نص كيلو شيش طاووق متقطع صغير
- ربع كيلو سوسيس
- فلفل الوان
- مشروم
- معلقة كبيرة صلصة
- معلقة كبيرة صويا صوص غامق
- ملح، فلفل، كركم، بهارات، زعتر
- عبوة مرقة دجاج (كنور) الفورية الجديدة
طريقة التحضير
فى حلة هننزل الزبدة و نشوح البصل فيها بعد كدة ننزل بالشيش و نقلبه كويس لحد ما يستوى ننزل بعده بالفلفل و المشروم و اخيراً بالسوسيس، بعدها هنحط التوابل و الصلصة و صويا صوص و مرقة دجاج كنور الفورية و نقلب كويس، بعد كدة هنشيل نص الخلطة دى فى حاجة على جنب و على النص اللى عندنا فى الحلة هننزل بالارز.
نقلب الارز كويس مع الخلطة بتاعتنا علشان يتطعم بكل المكونات دى و يشرب من الطعم بعد كدة ننزل بالمياه و نديله غلوة حلوه، بعد كدة نوطى النار و نغطى عليه لحد ما يستوى.
بعد كدة هنقدمه فى طبق و ننزل عليه بالكمية اللى شيلناها على جنب و يبقى معانا طبق ارز كامل متكامل مش محتاج جنبه حاجة، جربوا الوصفة الخطيرة دى و قولوا لنا رأيكم 😍😍
