أحدث الوصفاتالاطباق البحرية

مكرونة بينك صوص بالجمبرى

مكرونة بينك صوص بالجمبرى

النهاردة هنعمل وصفة هى قنبلة نكهات، حاجة كدة الشوكة الواحدة منها فيها اكتر من طعم داخلين فى بعض… مكرونة بينك صوص بالجمبرى و البيف بيكون … يلا بينا 😍

المقادير

  • كيس مكرونة
  • زبدة
  • جمبرى
  • بيف بيكون
  • طماطم محففة
  • مشروم
  • ثوم
  • ٣ طماطم مسلوقين و منزوعين الجلد و البذر
  • ٢ معلقة كبيرة صلصة
  • ملح، فلفل، زعتر
  • ٥٠٠ مل كريمة طهى

هنسلق المكرونة و نجيب جنبها حلة او طاسة هنشتغل فيها كل حاجة، هنحط زيت و نشوح الجمبرى و بعد ما يستوى نشيله و فى نفس الطاسة نحط الثوم.

لما الثوم يتشوح ننزل بالبيف بيكون و المشروم

هنسلق ٣ طماطم و نشيل الجلد و البذر او نستخدم الطماطم المعلبة الجاهزة، بعد كدة هننزل الطماطم على الثوم و عليهم معلقتين الصلصة.

بعد ما الصلصة و الطماطم يتسبكوا شوية هننزل عليهم بالكريمة و هنا هيبدأ اللون ال(بينك) و نقلب كويس و نوطى شوية نسيب الصوص يتقل

بعد كدة نرجع الجمبرى تانى و الطماطم المجففة و تكون المكرونة فى الوقت ده اتسلقت نروح حاطينها على الصوص و نسيبها شوية برضه تاخد و تدى مع الصوص.

بعد كدة هنقدم بقى و نحط شوية جبنة بارميجان على الوش و هتبقى اخر دلع، جربوها و قولوا لنا رأيكم 😍

المصدر: @muhammedhazem

5/5 - (4 أصوات)

Mohammed Hazem

- TikTok Hero Award 2020🥇(Best food content 2020 middle east) - Cook/food blogger ‎- مرجع المطاعم - Lotus king‎- #بشاميل_الخميس - Burgers Addict

اترك تعليقاً

زر الذهاب إلى الأعلى