أحدث الوصفاتالساندوتشات والمعجنات

سندوتش بانيه

سندوتش بانيه

أنا اتربيت على سندوتش بانيه كدة من مكان مشهور و أنا صغير و كنت دايماً اسأل هو ازاى سندوتش بانيه بس خطير كدة .. حاولت اوصل و اعلى كمان عليه .. تعالوا بقى نشوف اقوى سندوتش بانيه 🔥🔥

(مقادير العيش)

  • كوباية لبن
  • معلقة صغيرة سكر
  • باكو خميرة
  • ٦٠٠ جرام دقيق
  • ربع كيلو بطاطس مهروسة (الوزن بعد السلق)
  • بيضتين
  • ١٠٠ جرام زبدة
  • ٧٠ جرام سكر

هنسلق البطاطس و نهرسها و نوزن ربع كيلو

بعد كدة هندفى اللبن (مش سخن) دافى بسيط خالص، ١٥ ثانية فى المايكروويڤ، بعد كدة هنحط عليهم معلقة السكر الصغيرة و باكو الخميرة و نقلبهم و نغطيهم ١٠ دقايق لحد ما يخمروا.

بعد كدة فى عجان (ممكن نعجن على إيدنا بس هيبقى متعب شوية) هنحط اللبن مع الخميرة و السكر و عليهم الدقيق و البيض و البطاطس و نعجن حوالى ١٠ دقايق (لازم وقت العجن يكون طويل) بعد كدة الزبدة بحرارة الغرفة هنضيفها بشكل تدريجى و نكمل عجن ٥ دقايق كمان.

كدة العجينة هتبقى جاهزة معانا، هنسيبها فى بولة مدهونة زبدة ساعتين تخمر.

بعد كدة هنقسمها و نفردها و نطولها شوية زى الفينو كدة

على صينية فيها ورقة زبدة هنحط العيش، أنا عملت جزء فى قوالب فويل عملتها على شكل طويل و عريض و دبستها علشان الرغيف يبقى واخد شكل، ممكن كمان نستغنى عن الخطوة دى.

هنسيب العيش يخمر ساعة كمان بعد كدة هنجيب بيضة نحطلها معلقة مياه و ندهن بيها العيش

على درجة حرارة ١٨٠ نبقى مسخنين الفرن من قبلها من ٢٠ دقيقة لنص ساعة، بعد ما ياخد اللون الحلو نطلع العيش و ندهنه دهنة زبدة خفيفة كدة ….. كدة بقى عندنا أحلى عيش ممكن تجربوه.

(مقادير البانيه)

  • نص كيلو صدور فراخ بانيه
  • ملح
  • فلفل
  • بابريكا
  • عصير ٣ بصلات

هنتبل الفراخ و نشيلها ممكن ليلة كاملة بعد كدة نطلعها نحطها فى دقيق و بيض و بقسماط و هنتبل البقسماط بشوية فلفل اسود بعد كدة ننزل فى زيت لحد ما تاخد اللون الذهبى العظيم ده.

(الصوص)

  • معلقتين كبار مايونيز
  • معلقة كبيرة جبنة كريمى

نحط كله على بعضه و نقلب و كدة الصوص يبقى جاهز

أخيراً بقى هنحضر السندوتش، نحمص العيش فى شوية زبدة، بعد كدة نحط عليه صوص و خس و طماطم و ننزل بالفراخ بتاعتنا و عليهم جبنة و بس كدة.

كدة عندنا أحلى سندوتش بانيه بجد حاجة جامدة جداً، جربوا طريقة العيش و طريقة البانيه و قولوا لى رأيكم 😍

المصدر: @muhammedhazem

Mohammed Hazem

- TikTok Hero Award 2020🥇(Best food content 2020 middle east) - Cook/food blogger ‎- مرجع المطاعم - Lotus king‎- #بشاميل_الخميس - Burgers Addict

اترك تعليقاً

زر الذهاب إلى الأعلى