《فطاير سريعه》
هذي كانت الفطاير اللي سويتها بحلقة يوم السبت .. كانت رائعه وخنينة و #لذيذة_لذاذة_اللذوذين_كلهم😋👌
◾المقادير بالأكواب القياسية:
- 1 م.ك سكر
- ملعقه كبيرة مليانه خميرة
- كوب ونص ماء دافيء
- نص كوب روب او زبادي
- ربع كوب زيت
- ربع م.ص ملح
- 🔸️4 اكواب طحين وممكن نحتاج ربع كوب زيادة .. استخدمت طحين المطاحن
◾للحشوة:
🔸️نقانق .. بقدونس .. جبنه بيضا .. جبنة حلوم .. زيتون شرايح
🔸️خليط الدهن للتلميع: بيض وبابريكا واعشاب عطرية (زعتر اوريجانو ريحان اي شي متوفر بس ناشف يكون)
🔸️خليط الدهن بعد الفرن: زبدة ذايبة (او) زيت زيتون وثوم
#فطاير_كلحه #فطاير_مدرسية_كلحه
طريقة التحضير
🔹️بكوب نحط السكر والخميرة والماء ونخلطهم بالملعقه شوي ونخطهم عشر دقايق بمكان دافي مظلم والنتيجه تفور الخميرة وتتفاعل
🔹️نصبه بالعجانه وقبل لانشغلها نضيف كوبين طحين والملح وبالخفاقه اليدوية اخلط ترررررر لمن يتجانس الخليط
🔹️نشغل المكينة .. ونضيف باقي الاكواب ونكمل عجن عالاقل اربع الى خمس دقايق والعجينه تتماسك
⚠️ بتكون لزجه شوي .. ممكن هالوقت نضيف طحين بس نصيحه مو اكثر من ربع كوب
🔹️نطلعها ونحطها بطبق مدهون زيت ونغطيها بنايلون ونخليها تختمر بمكان دافي ساعه الى ساعه ونص
🔹️بعدها .. نطلعها ونحطها بطبق عميق كبير ونضيف فوقها مكونات الحشوة ونخلطهم باليد .. ممكن ندهن ايدنا زيت اذا تعسرت معانا
🔹️نقطعها كرات متساوية الحجم او حسب الرغبه ونصفهم بصينية عليها ورق زبده
ندهن الوجه بخليط البيض والبابريكا (البابريكا تعطي لون حلو) ونرش عالوجه سمسم حبة البركه وزعتر ناشف او اي اعشاب ثانية وممكن الاستغناء عنها
🔹️ندخلهم فرن محمي مسبقا 200 درجه من فوق وتحت … الصينية بالوسط .. وخلو فوق عالهادي شوي
🔹️يمكن عشر دقايق وتكون جاهزة وبس نطلعها اهي وساخنه ندهن الوجه بالثوم والزبدة وبألف عافية 😊👌🏻
⚠️ للاحتفاظ فيها .. بس تصير دافية وقبل لاتبرد .. نعبيها باكياس ونسكرها علشان الرطوبه تتم بالداخل والفطاير تظل طرية .. وبس تبرد وهي داخل الاكياس نحطها بالفريزر
#٢٠١٨_كلحه
هل الفيديو لا يعمل؟ إضغط هنا
