وهذا ورق العنب بطريقة عمتي نوره * ♥️🍃طبعاً هي ماعندها حساب فعشان كذا راح أحط منشن لعمتي فطوووم @fatma_ali هي ساكنه بالشرقيه والا كان شفتوني أصور طبخها الفنان 😉👌🏻 .
١- أول شيء نجيب ورق عنب سواء طازج أو معلّب أسهل لكم ومتوفر بكل وقت لأن الطازج له وقت محدد يبي لكم تاخذونه وتفرزنونه المهم المعلب أفضل نوع جربته اسمه ( قلب الطبيعه ) ورقته خضراء وخفيفه تهبل ولافيه عروق تغث ! صح بعض الورقات تجي صغيره بس عادي تقدرون ترقعونها فوق بعض وتضبط 👌🏻
طبعاً بتسألون من وين ؟ تحصلونه بمحلات كثيره : التميمي ، الدانوب ، أسواق المزرعه ، الثلاجه العالميه ( النخبه ) ، بنده ، وأنا أخذه من محلات المنتجات الشاميه بحي السليمانيه آخذ منهم كرتون .
الحين خلاص عرفنا من وين ناخذ الورق ونغسله ونخليه في مصفاة ونخليه على جمب . طبعاً المقدار اللي راح أكتبه لعلبه وحده ..
٢- الحشوه :-
٤ أكواب رز مصري استخدمت ( صنوايت ) أغسله وأصفيه من الماء وبعدين أجيب تاوه وسيعه : وأقطع بصله تكون متوسطة الحجم تقطيع ناعم + ٣ فصوص ثوم مفرومه ناعمه وأضيف عليهم ملعقتين كبيره زيت زيتون وأحركهم لين يذبلون وبعدين أضيف الرز وأضيف عليه :
( ملح ، فلفل أسود ، فلفل أحمر مجروش ) + ( ربع كوب بقدونس وكزبره مفرومه ، قبضة اليد ورقات نعناع مفرومه ، عصير ٤ليمونات ، ربع كوب زيت زيتون ونقلبهم مع بعض ونطفّي النار بدون مايستوي .
٣- نجيب القدر ونحط فيه شرائح بصل ، بطاطس ، جزر ، حبات فلفل أحمر كامله نحط حبات تحت وحبات فوق الورق آخر شيء وبعدين نبدأ نحشي ونلف الورق ونصفّه فوق بعض لين ننتهي من الكميه .
٤- الورق الباقي نغطّي فيه الورق وبعدين نحط صحن نضغطه فيه ونضيف الخلطه : نص كوب زيت زيتون + نص كوب دبس رمان + نص كوب عصير ليمون .
وبعدين نضيف ماء مغلي لين نغطّي كل الورق ونخليه يطبخ على نار عاليه شوي اذا بدى يغلي نخففه على نار هاديه تقريباً ساعتين ويصير جاهز .
طبعا ًعشان مايسوّد معكم طفّو النار وخلوه بمكانه لين يبرد برا الثلاجه بعدين دخلوه الثلاجه اذا مو مستعجلين واذا مستعجلين خلاص اقلبوه ورتبوه بالصحن وجمّلوه بحبيبات الرمّان .
وعساه بألف عافيه على قلوبكم ♥️
