: كيكة الدّخن مع قطع التمر والجوز :
لذذذذذيذه للي يحبون الدّخن راح يدمنون الوصفه 😋🙊 .
1- بالخلاط /
بيضتين + م ص فانيلا + م ك خل أبيض + نصف كوب سكر + ربع كوب زيت + علبة زبادي + كوب تمر منقوع في كوب ماء ساخن نتتظر الماء يصير دافي وبعدين نخلط كل المكونات مع بعض .
** تنبيه :- الماء تخلطونه مع التمر بمحضرة الطعام عشان ماينهرس تماماً حلو يكون فيه قطع صغيره .
2- نضيف المكونات السائله اللي خلطناها بالخلاط على :
كوب ونص دخن مطحون + نص كوب دقيق أسمر +
م ك بيكنج بودر + م ص بيكربونات الصوديوم + م ص قرفه مطحونه + نص كوب جوز مكسر كسر صغيره ( اختياري ) + ربع م ص ملح ، نخلطهم مع بعض بالسلك اليدوي وبعدين نضيف المقادير السائله ونحرّك بخفّه
لين يختفي الدقيق بدون مبالغه في الخلط .
3- نجيب صينيه متوسطة الحجم وندهنها بطحينة السمسم ونرش عليها سمسم محمص + حبة سوداء وبعدين نضيف الخليط وندخلها الفرن يكون مسبق التسخين على درجة حراره 350 فهرنهايت مشغل من تحت فقط و بالرف الوسط وما نفتح الفرن الا بعد نص ساعه أخذت مني تقريباً 50 دقيقه . .
الأفضل بعد ما تستوي وتقلبونها تقدمونها
بدون صوص لذيذذذذه بدون أي صوص 😋👌🏻
أو يكون الصوص على جمب شيء خفيف مثل : ( كاراميل أو عسل ) مو حلو يكون الصوص ثقيل .
على ذوقي ماأحب يكون معها صوص ثقيل حلاتها
بهالطريقه قطع تمر وجوز داخلها حبيتها من قلب حتى الصغار أعجبتهم و كان عندي جارتي أردنيه قدّمتها لها أكلت القطعه كامله تقول : ( كتييييييير زآكيه يسلمو يدينك ) 😋👌🏻 جعله عافيه على قلبها ❤️ وعلى قلوبكم يارب 😘✨
