| كيكة الجزر🥕 مع كريمة الجبن والكاراميل |
أول شيء نجهّز خليط كيكة الجزر حسب التعليمات أخذت الخليط من ملتقى الخبازين يجننن الخليط عجبني مره مضبوط و لمن نطلّع الكيكة من الفرن وهي ساخنه نسوّي فتحات بالسكين على الوجه .
بعدين نغطّيها بخليط كريمة الجبن عباره عن :
كوب جبنة فلاديفيا + كوبين سكر بودرة + م ص فانيلا سائلة نخلطهم بالخلاط مع بعض لين يندمجون ونفرد الخليط ع الكيكة .
بعدين نرش ع الكريمة جوز بيكان محمّص وآخر شيء خطوط من صوص الكاراميل يكون قوامه ثقيل .. وأخلّي الكيكة ترتاح عند المكيف يعني تبرد على راحتها واللي تبي تدخلها الثلاجه ينفع عادي بس أنا أحبها كذا تبرد على راحتها أتلذذ فيها أكثر .
** الحين اللي ما عندها الخليط أو ما تقدر تشتريه بأكتب لكم طريقة كيكة جزر سهله ومضبوطه /
نخفق ثلاث بيضات مع نص م ص فانيلا سائله و ثلاث أرباع كوب سكر بنّي ناعم واصبع زبده ذآيبه 100 جرام لين يصير الخليط كريمي بعدين نخلط المقادير الجافة مع بعض : كوب طحين أبيض كويتي + م ص بيكنج بودر + م ص بيكربونات الصوديوم + نص م ص ملح + م ص قرفه مطحونه و بعدين نضيف عليهم خليط البيض ونخلطهم مع بعض وآخر شيء كوب جزر مبشور + ثلاث أرباع كوب جوز البيكان مكسّر + م ص بشر برتقال ..
وبعدين نفرد الخليط بصينيه صغيره وندخله لفرن مسبق التسخين بالرف الوسط على درجة 180ْ و بس والله 👌🏻
أنصحكم تجربونه لذيذ لأبعد حد 🤤👌🏻 متحمسه مره أشوف تطبيقاتكم وردّة فعلكم عنه 😍✨
