صينية الدجآج مع البطاطس المهروس 😋👌🏻
لذيذه بشكل ماتتصورونها 😢💔 أضمن لكم هالصينيه لمن تحطونها ع السفره مايبقى فيها ولا نقطه 😋👌🏻
الطريقة :-
١- نقطع الدجاج مكعبات سواء صدور أو دجاجه كامله بس بدون عظم .
٢- نجيب تاوه وسيعه ونحط فيها شوي زيت ونرفع النار أعلى شيء بحيث أول ماتحطون الدجاج يتماسك ويقلب لونه أبيض بدون ماتنزل منه مويه ونقلّب فيه لين يتحمّر من الجهتين مو شرط يستوي أهم شي يتحمّر وبعدين نحطه بصحن ونخليه على جنب .
٣- بنفس التاوه نضيف شوي زيت ونضيف شرائح رفيعه بصل + ثوم مهروس ونقلّب لين يذبل بعدين نضيف فلفل رومي مقطع شرائح رفيعه وفلفل حار للي يحب ، وبعدين نضيف الخضروات اللي تحبّون أنا فقط أضفت جزر مقطع مكعبات صغيره .
٤- نرجّع الدجاج ونضيف البهارات 🙁 فلفل اسود وفلفل أحمر وبهارات ايطاليه و شوي كركم وشوي زنجبيل بودره ) وملح .
٥- نضيف كريمة الطبخ ( لمن تروحون السوبر ماركت تحصلونه بالثلاجه فيه نوعين شيء مكتوب عليه كريمة خفق وشيء مكتوب كريمة طبخ ) كريمة الخفق تنفع مع الطبخ بس كريمة الطبخ هي اللي ماتنفع مع الحلويات فهمتو علي 🙊 ؟ يعني عندك كريمة خفق عادي ضيفيها ع الدجاج تنفع 👍🏻.واللي يحب يزيد مع الكريمه جبن حلو بس راح تكون دسمه مره احب اكتفي بالكريمه .
ونخلي النار هاديه لين يتسبك الخضار مع الدجاج ويستوي مضبوط ولازم ماتنشف الكريمه يعني خلطة الدجاج يكون قوامها سايل شوي وبعدين نحط الدجاج بالصينيه كطبقة أولى .
٦- الطبقة الثانية :-
نكون سالقين بطاطس والأفضل عند السلق تقطعونه قطع كبيره ماتخلونها كامله بحجمها عشان تستوي أسرع أنا غلطت وحطيتها بحجمها وكانت كبيره واستعجلت عليها فصار فيها قطع صغيره ماانهرست مره .
نخلط البطاطس بالخفاقه اليدويه ونضيف ملح وفلفل أسود وبقدونس مفروم وبياض البيض اللي مايحب البياض لايضيفه بس مايأثّر أبد في النكهه ، فايدته : يخلي البطاطس لمن نسوّي فيه أشكال تحافظ على قوامها مع الفرن .
٧- لكم الخيار: البطاطس تشكلونه بقمع نفس الصوره فوق أو تواسونه فوق خلطة الدجاج وبعدين آخر شيء نحط بقسماط مع شوي اوريغانو .
٨- ندخلها الفرن ونشغل من فوق لين تتحمّر وبس تتقدّم مع الخبز المفرود أو تحشونها بأي نوع خبز تحبّون ♥️
وجعلها بألف عافيه يارب 😘🌹
-ملاحظه :- تنفع جداً تصلحونها ميني بالقوالب اللي تدخل الفرن اللي نصلح فيها السوفليه يطلع شكلها مرتّب وجميل 😍👍🏻
