النهاردة هنعمل حاجة قوية شوية .. هنعمل بيتزا … بس دورين .. حوار كبير اوى يلا بينا …. 🍕🍕
المكونات والمقادير
- ٣ كوبايات دقيق
- كوب إلا ربع مياه (دافية مش سخنة)
- معلقة سكر
- معلقة خميرة
- ٣ معالق كبار زيت زيتون
- رشة ملح و زعتر
فى كوباية هنحط المياه، ١٠ ثوانى فى المايكروويڤ و نحط عليها الخميرة و السكر و نقلبهم و نغطيهم و نسيبهم ١٠ دقايق لحد ما يخمروا و يعملوا رغاوى زى فى الڤيديو كدة.
بعد كدة فى بولة هنحط الدقيق و عليه الزيت و الملح و الزعتر و عليهم بقى المياه مع الخميرة و السكر و نعجن كله مع بعض لحد ما تلم معانا بالكامل و تبقى كورة كدة نسيبها و نحط عليها شوية زيت زيتون من بره و نغطيها و نسيبها تخمر .. ساعة على الأقل.
بعد كدة نجيب العجينة و نقسمها نصين
فى صينية هندهنها زيت زيتون و ننزل عليه العجينة و نفردها فى الصينية و لما تتفرد كويس ننزل عليها بجبنة كريمى و موتزاريلا بعد كدة نحط الطبقة التانية من العجينة فوقيها.
بعد كدة نحط صوص البيتزا فى النص و عليه الجبنة الموتزاريلا و نحط البيبرونى من بره علشان يقرمش و بصل احمر و مشروم و فلفل اخضر و زيتونس
فى فرن و على درجة حرارة عالية (بالنسبة لى ٢٤٠) و بنسيبها حوالى ٢٠ دقيقة مع المتابعة.
بعد كدة هنطلعها بقى و نقطعها و ناكل احلى بيتزا، وصفة تفصيلها كتير شوية بس النتيجة رهيبة، جربوها و قولوا لنا رأيكم 😍😍
