وصفه بسبوسه بالقشطه على طريقه امي❤️ احبهااا ولازم اللي ماجربها يجربها ، سهله وجدا لذييييذه .. ومنزلتها من قبل بس بعيدها للمتابعين اليدد.
.
البسبوسه:
١ كوب سكر
١ و ٢/١ كوب سميد خشن
٣/١ كوب جوز هند
١ كوب زيت
١ علبه روب
٢ بيض
٢ م ص بيكنق باودر
١ م ص فانيلا
.
القشطه:
١ كوب حليب
١ كوب كريمه سائله (كريمه خفق)
١ علبه قيمر (قشطه) = ٢٥٠ مل
٣ الى ٤ م ك نشا
٣ م ك سكر
..
*اولا القشطه:
في جدر متوسط نضع كل المكونات ماعدا القيمر ونخلطهم الى ان يذوب النشا تماما ، تالي نضيف القيمر ونضع الجدر على نار هاديه ونخلطه باستمرار عشان لايحترق من اطراف الجدر ولين .. وبعد ماتثقل القشطه وتطلع فقاعات نرفع الجدر من عالنار ونخليه يبرد شوي بالثلاجه ساعه او ساعتين!
.
*ثانيا البسبوسه:
في وعاء كبير نخلط جميع المكونات الناشفه ونضيف عليهم باقي المكونات كلهم ونخلطهم بالملعقه مايحتاج خلاطه.
.
نسخن الفرن على ١٨٠ من تحت فقط والحديده بالوسط.
ممكن تسوونها في الفناجين مثل ماموضح بالفيديو او نجهز بايركس كبير وندهنه بزبده او بخاخ الزبده .. ونصب نصف كميه البسبوسه ، ونحط فوقها القشطه بعد مابردت شوي (القشطه نحطها عالبسبوسه شوي شوي بالملعقه عشان لا تنزل تحت البسبوسه)
واخيرا فوق القشطه نصب النصف الاخر من البسبوسه وندخله الفرن لمده ٣٥ الى ٤٥ دقيقه او الى ان تتحمر من الاطراف ومن فوق .. واذا تحمرت بس من الاطراف وماتحمرت من فوق فتحو الفرن من فوق بس اخر شي عشان تتحمر وطلعوها بسرعه.
واول مانطلعها من الفرن نشربها بالشيره شوي ونخليها تبرد تالي.
.
*ثالثا الشيره:
٣ كوب سكر
٢ كوب ماء
١ ملعقه كبيره عصير ليمون
قليل من ماء الورد او ماء زهر (حسب الذوق)
زعفران (اختياري)
..
نضع السكر والماء في جدر على نار متوسطه حتى يذوب السكر وبس يبدأ يغلي وتطلع فقاعات نضيف الليمون وماء الورد ونقصر عالنار ونخليه ٢٠ دقيقه على نار هاديه.
وتحفظ الشيره في الثلاجه لمده اشهر ، عادي ماتخترب.
