اطيب عجينة دونات القشرة كرسبي والدونات قطنية 👌
المقادير للعجين :
- استخدمت الكوب المعياري ٢٥٠ مل
- بنخلط ٢ معلقة كبيرة ممسوحة خميرة مع ٢٦٠ مل (اكثر من كوب بشوي) من الحليب الدافي وبنتركهم عجنب لحتى تتفاعل الخميرة
- ٤ اكواب ونصف طحين متعدد الاستعمالات
- ثلث كوب سكر ناعم الحبيبات
- ٢ حبة بيض بحرارة الغرفة
- اصبع زبدة (١٠٠غ) بحرارة الغرفة
- معلقة صغيرة ملح
طريقة التحضير
بنخلط كل المقادير سوا واخر شي بنضيف خليط الحليب بنعجن العجين لمدة ١٠ دقايق وبنتركها ترتاح ساعة كاملة او حتى يتضاعف حجمها.
بنزل العجين بعد ما تخمر بعد ما نرش السطح بالطحين منيح وبنحاول ما نفرغ الهوا من العجين مثل المعجنات وبنفردها بحيث يكون ارتفاعها من من سم الى سم ونص وبنقطعها بقطاعة الدونات (لو مش متوفرة اي قطاعة او كاسة دائرية وباي غطا بنثقبها من الوسط) بنحط القطاعة بالطحين قبل لنقطع حتى ما تلصق بالعجين وبنحط كل حبة دونات على ورق زبدة حتى نحافظ عشكلها وبنتركها تخمر مرة ثانية نصف ساعة.
بنسخن الزيت عحرارة ١٦٠ وضروري جدا نحافظ عحرارة الزيت لو زادت الحرارة نرجع نوطيه لانو اللون بعتمد عحرارة الزيت.
ممكن تحطوا الحبات بخليط السكر والقرفة مباشرة وهي سخنة ليلصق فيها اما الجليز اللامع مثل الفيديو بنترك الحبات تبرد شوي قبل لنحطوا بالصوص.
صوص الجليز : ٢ كوب سكر بودرة مع ٢ معلقة كبيرة سكر بودرة (ممكن تزيدو حسب القوام اللي بدكم اياه) والملون من اختياركم وممكن تضيفوا عليه كاكاو بودرة لو مش متوفر عندكم الملون وبتزينوا حسب ذوقكم وع قلبكم بالف
عافية.
