النهاردة هنعمل اقوى طاجن عكاوى هتاكله فى حياتك … تعالى احكيلك 😍
المقادير
- عكاوى
- ٤ بصلات متقطعين اجنحة
- سمنة
- خلطة ال١١ بهار من كنور
- مرقة لحمة من كنور
- بطاطستين كبار
طريقة التحضير
هنجيب حلة و نسخنها كويس و نحط فيها سمنة و نجيب العكاوى اللى متبلينها بفلفل اسود و ننزل بيها فى السمنة و لما تاخد لون نقلبها على الناحية التانية.
بعد ما تلون كويس نشيلها فى طبق و ننزل مكانها بالبصل و نقلب كويس لحد ما يكرمل ننزل عليه بخلطة ال١١ بهار الخطيرة من كنور و نقلبها مع البصل و ننزل بمكعب مرقة لحمة و نرجع بقى العكاوى للبصل و نقلبها معاها.
على جنب يكون معانا مياه مغلية ننزل بيها على العكاوى بس نفس الكمية اللى فى الڤيديو كدة مش اكتر.
نوطى النار و نغطى عليها و نسيبها ساعتين.
بعد ساعتين هتبقى دايبة خالص ننزل بقى بالبطاطس و نقلبهم كويس.
نجيب الطاجن بقى و نقلب فيه كل حاجتنا و نديله وش سمنة و ندخله الفرن و ممكن بعدها نفتح الشواية تاخد وش.
هتاكل بقى يا باشا احلى طاجن عكاوى فى الكوكب، جربه و ادعيلى 😍
