أحدث الوصفاتالاطباق الرئيسية

محشى الكرنب

محشى الكرنب

أعز الأكلات على قلبى، محشى الكرنب، النهاردة هنعمل محشى الكرنب بكل تفاصيله….. يلا بينا.

المقادير

  • كرنبة وسط
  • ربع كيلو لية
  • ٤ بصل
  • معلقة كبيرة ثوم مفروم
  • ٦ طماطم
  • ٤ معالق كبار صلصة طماطم
  • توابل (ملح، فلفل، كمون، بهارات)
  • مرقة الخضار
  • ٦ كوبايات ارز
  • حزمة شبت مفروم
  • حزمة بقدونس مفروم
  • حزمة كسبرة مفروم

هنعمل الخلطة الأول، هننزل اللية و هنشوح البصل لحد ما يحمر بعدها نضيف الثوم و نديله تقليبة كدة، بعدها نحط الطماطم و عليها الصلصة و نسيبها تتسبك، بعد كدة نضيف التوابل و مرقة الخضار من كنور و عليها الارز نقلب تقليبتين و نطفى النار و نضيف البقدونس و الشبت و كدة خلطة المحشى تبقى جاهزة.

الكرنب هنقطعه زى ما واضح فى الڤيديو بعد كدة هنسلقه فى مياه فيها كمون تكون المياه بتغلى الجزء المتقطع بياخد دقيقة على كل ناحية، بعد كدة نطلعه و نقطعه زى ما واضح فى الڤيديو و نبدأ نحشى، الكرنب سهل مش بيتقفل من الجنبين، هو بيلم لوحده فى التسوية.

(مقادير الشوربة)

  • توابل (ملح، فلفل، كمون)
  • لتر مياه سخنة
  • معلقتين كبار صلصة
  • ربع كوباية سمنة
هنحط الحاجات دى على بعض و نقلب كويس و كدة الشوربة تبقى جاهزة.

هنجيب لحمة انتركوت شرايح نتبلها بملح و فلفل و نشوحها على الناحيتين و نفرشها فى حلة المحشى من تحت بعد كدة نرص المحشى و ننزل عليه الشوربة و نسيبه لحد ما يغلى بعد كدة نوطى عليه و نغطيه و نسيبه يستوى على الهادى علشان يدملك مع بعضه كدة و يبقى رهيب 👌🏻

كدة إحنا عملنا محشى كرنب مع لحمة انتركوت، جربوه هيعجبكوا جداً و قولوا لى رأيكم 😍

الوصفة ممكن تبقى نباتى او صيامى لو غيرنا اى دهون بزيت و شيلنا اللحمة و هتبقى حلوة جداً برضه.

المصدر: @muhammedhazem

5/5 - (7 أصوات)

Mohammed Hazem

- TikTok Hero Award 2020🥇(Best food content 2020 middle east) - Cook/food blogger ‎- مرجع المطاعم - Lotus king‎- #بشاميل_الخميس - Burgers Addict

اترك تعليقاً

زر الذهاب إلى الأعلى