《قدرة قادر بالفستق》
طبعا الاغلبية تعرف قدرة قادر .. وعادة نسويها بالشوكولاته .. بس هالمرة سويتها بكيكة الفستق .. شي فخم الصراحه و #لذيذة_لذاذة_اللذوذين_كلهم😋👌
مقادير الكيكة
- ٤ حبات بيض
- ثلاث ارباع كوب سكر
- فانيلا سائل
- ثلث كوب زيت
- كوب حليب
- ١ م.ك صلصة فستق ( استخدمت كوت اند فل) طبعا ممكن اي ماركه ثانية بس اختاروا شي جيد وطعمه حقيقي
- كوب و ثلاث ارباع طحين
- ملعقه وسط او صغيرة ملياانه باكنغ باودر
- نص كوب فستق مطحون
- نقطه ملون طعام اخضر لتعزيز اللون
مقادير الكريم
- علبة حليب مكثف ٣٧٥جرام
- ٣ بيض
- نص كوب ماء
- هيل وزعفران او نكتفي بالفانيلا السائلة
مقادير الكراميل
- كوب سكر
- ربع كوب ماء
طريقة التحضير
🔹️بالاول نجهز قالب مفتوح من الوسط او اي شكل ثاني بس لو ما كان مفتوح من الوسط انصحكم مايكون مرتفع
🔹️نحط بمقلى السكر والماي ويترك بدون تحريك لما يذوب السكر ويبدأ يتكرمل .. نحركه عالخفيف لما يذوب تماما ونصبه بالقالب
🔹️نجهز خليط الكريمه .. ممكن نستخدم خلاط الكأس او محضرة الطعام كله ينفع ونحط كل المقادير طاخ طيخ فوق بعض ونشغل تررررررررررررر وانتهينا 🤭
🔹️نصب الكريم فوق الكراميل ونبدا بتجهيز الكيك
🔸️نجهز الكيكة بخفق السكر والبيض والفانيلا ترررررررررر
انزل الزيت بالتدريج والمكينه شغاله ونخفق تررررررررر
🔸️الان بالتناوب انزل:
خليط النواشف (طحين باكنغ باودر وفستق مطحون وملح)
🔸️مع خليط السوائل (حليب وصلصة فستق وملون طعام)
🔸️ونكمل خلط ترررررررر لما يتجانس الخليط واصبه بهدوء بملعقه او نصبه صب بس شوي شوي فوق خليط الكريمه
🔹️نحط القالب بمغطس ماء وعالفرن المحمي مسبقا .. حرارة ١٨٠ .. تحت فقط .. لمدة ساعه الا ربع او حسب قوة فرنكم
🔹️تترك برة الفرن تبرد وتدخل الثلاجه عالاقل اربع ست ساعات
🔹️لما نجي نقلبها نغطسها بماء حاار دقيقه ونقلبها وبالعافية 😊👌🏻
#قدرة_قادر_فستق_كلحه #حلويات_كلحه
