في الفيديو عملت نصف المقدار
المقدار بالاكواب المعيارية
بنبس كيلو سميد ناعم مع ٣٠٠غ سمنة او زبدة مذابة ودافية وكاسة زيت نباتي بحرارة الغرفة بنبسهم منيح وبنغطيهم وبنتركهم اقل شي ٢٤ ساعة وكل ١٢ ساعة بنرجع بنبسهم.
بعد مرور المدة بنضيف النواشف وهي عبارة عن ٣ اكواب طحين وكوب حليب بودرة وكوب ونص سكر بودرة وبهارات المعمول ومعلقة صغيرة باكينغ باودر ورشة ملح.
بنذوب معلقة كبيرة سكر ومثلها خميرة في نصف كوب ماء دافئ وبنحركهم وبنتركهم لتتفاعل الخميرة وبنحطهم ع الخليط مع نصف كوب حليب سائل دافي وبنعجنهم منيح اخر شي بنضيف نصف كوب ماء ورد وبنعجنهم لتتشكل عنا عجينة متماسكة وبنتركها ساعة ترتاح.
بعد ساعة ممكن نوع السميد يمتص كل السوائل وتحتاج معنا ماء زيادة ضيفوا ماء دافي بالتدريج كرشات خفيفة دون مبالغة ليصير عندكم قوام العجينة مثل ما هو واضح بالفيديو ما فيها تشققات بنحشيها حسب الرغبة (جوز او فستق حلبي او تمر)وبنخبزها ع حرارة ٢٠٠ بفرن محمى مسبقا بنحمرها من فوق اول لتحافظ عنقشتها لغاية ما توخذ اللون الورد وبنحمرها بعدين من تحت وصحة والف هنا.
ملاحظة : توابل المعمول هي بهارات خليط تجمع تلك المكونات ( شومر مطحون، يانسون مطحون، محلب مطحون، قرفة مطحونة)
الحشوات : بكيت عجوة بنعجنوا مع زبدة او سمنة ليطرى ورشة قرفة ونص معلقة صغيرة دقة الكعك.
