الوافل البلجيكي

| الوافل البلجيكي 🧇|

أحب هذا النوع من الوافل مقرمش من برا وهش جداً من داخل وحبات السكر اللؤلؤي إضافة لذيذة خاصه لمن تتكرمل مع القشرة الخارجية للوافل ..

أتلذذ فيه مع كوب قهوة سوداء ☕️😴 = راح أكتب الوصفة بالتفصيل لا تخافون من طولها بس عشان أشرح لكم كل شيء سويته بالخطوات /

490 جرام طحين متعدد الاستخدامات = ثلاث أكواب ونص + م ص ملح + م ص قرفة مطحونة ( اختياري )
هذي المقادير الجافة نخلطهم مع بعض بالسلك اليدوي ..

ثم الحين ناخذ وعاء العجانة ونضيف فيه :
250 مل حليب دافي يفضّل كامل الدسم يعني كوب واحد كامل + 8 جرام خميرة فورية ملعقتين صغيرة أنا استخدمت الطازجة لأني ابي استهلكها بس الغالب عندهم الفورية خليكم عليها عشان لا تحسّون
إن الوصفة معقّدة !
+ ملعقة كبيرة ونص سكر أبيض أو بنّي ..
نغطيهم شوي بس تتفاعل الخميرة ثم نضيف بيضتين مخلوطه زين مع م ص فانيلا سائلة ..
ثم نحرّك البيض مع خليط الخميرة بالسلك اليدوي بس يمتزجون .. ثم نركّب مضرب العجانه
ونضيف المقادير الجافّة ونخلط على سرعة هادئة اذا تكونت العجينة وتماسكت نبدأ نضيف الزبدة بالتدريج ..

الزبدة راح نحتاج 200 جرام تكون بارده ونفردهم بين ورقتين زبده لين تصير كتله وحده كريميه ثم نضيفها بالتدريج للعجينة على ثلاث أو أربع دفعات تمتزج الدفعة الأولى نضيف الثانية لين نخلص من كل الكمية ..

الحين نخليها تتخمر نص ساعة أقل شيء وأفضّل تكون ساعة ثم نضيف السكر اللؤلؤي البلجيكي أضفت منه ( كوب ) أخذته من هنا @flourish_ksa وخلطته مع العجينه بالسباتولا ، لو ماعندكم تقدرون تاخذون سكر نبات وتكسرونه تكسير خشن بحجم حبات السكر اللؤلؤي ..

الحين خلاص العجينة جاهزه تاخذين قطعة واذا عندك ميزان تقدرين توزنينها بحيث تكون حجم واحد ..
كبير أو صغير يعتمد على ذوقك وحجم جهاز الوافل عندك وقبل ماتحطين العجينة لازم يكون حار عشان بسرعة يستوي ويتحمر ولا يطول وينشف بزيادة !

الباقي من العجينة غلّفته زين وخليته بالثلاجة يوم كامل وبعدين من بكره على طول من الثلاجه وهي باردة خبزتها بجهاز الوافل بالنسبه لي حسيت طعمها ألذ والكرملة واضحه أكثر .. جداً لذيذ ووصفة ناجحة بإذن الله جرّبوه وعطوني رآيكم 😍 .

… وبالعافية مقدماً 💛