عندي ملاحظتنين اهتميت بالطريقة اكثر من التقديم
لا تنسون تعلموني شنو تسمون قاع القدر اللي هو الرز المحترق مع ذكر الدوله او المنطقة
بسم الله
طبق_اليوم كبسة دجاج على الطريقة اهل الدمام اللي انا وبكل فخر منهم 🌺🖤💙
مع ان في قاموسنا الدمامي لازم يكون بني وفي حمسة غير كذا لا يطلق عليه مجبوس😁
المقادير والطريقة:
نحمس البصل بدون زيت فقط كل ماحسينا بدا يلزق بالقدر نعطيه بلة ماي ونحركه بالاستمرار
نضيف الثوم ونحمسة مع البصل لمدة ٥دقايق
ونسرق جزء منه للحشوة
نحط الطماط والفلفل الرومي ونحمسة بعد ٥ د
ثم نضيف الكزبره وهي سر لذاذة مجبوسنا
ملعقة سمنة ونكمل الحمسة
نحط الدجاجة ورشة كزبره ثانية ونبهرها ببهارات البيت المخلوطة
عن نفسي أستخدمت بهارات سفرة النوخذة
نحط مقدار بيالة شاهي ماي ونسكر عليه يتسبك
نمرق القدر ونتركه يطبخ ٣٠ دقيقة مابعد الغليان
بعد ٣٠ دقيقة نملح القدر ونطلع الدجاج
ونكب الرز
الدجاجة على القدر متشبعه بهارات وهذا مايميز كبستنا😎
طريقة الرز ٢ سانتي الماي فوق الرز وعلى نار عالية اذا ارتفع الرز نهدي النار ونحط الحشوة
ونخليه من ٢٠ الى دقيقة على نار هادية
الحشوة راح تكون ببوست لحالها 😊
كذا علينا وعليكم بالعافية
