الفرينش توست

( الفرينش توست 🍞🍓 )

من ضرورياته أن يكون الخبز بايت يعني له يوم أو أكثر برا الثلاجة ..
ليش نخليه بايت لأنه راح يمتص الخليط بشكل ممتاز بدون ما يتفتت أو يتقطع ولمن نحمصه ع التاوه يصير من كل الجهات مقرمش بس من جوا طري 👌🏻

الخليط عباره عن : ثلاث بيضات + م ص فانيلا + نص كوب كريمة خفق + نص كوب حليب طازج + م ص قرفة مطحونه + رشة ملح نخفقهم زين مع بعض بعدين نصفّيهم بمصفاة ناعمة جداً ..
الحين الخليط جاهز ثم تجهزين لك تاوه تكون مانعة للالتصاق .. أنا أحب اسويه بالتاوة ( الحديد الزهر ) تعطي توزيع للحرارة ممتاز 👍🏻
طيب الحين يبقى الزبدة نحط قطعة مع شوي زيت ضروري عشان ماتحترق وأول مانحطها بالتاوة قبل ماتسخن خلك سريعة غطسي القطعة اللي قطعتيها من الخبز بالخليط من كل الجهات ثم ارفعيها و هزّيها لين ينزل منها الباقي من الخليط ..
ثم أول ماتشوفين الزبدة بدت تطلع منها فقاعات تحطين عليها القطعة تكون النار عالية ثم اخففها شوي للنص بحيث تاخذ لون حلو بدون ماتحترق وطبعاً أقلبها على كل الجهات …
ثم أرفعها على صحن و يصير باقي شوي من الزبدة بالتاوة لو مابقى انظفها ثم أحط شوي زبدة مع سكر بني و أخليه يذوب ويتوزّع على التاوة و أرجع القطعة وأقلبها بشكل سريع على كل الجهات ..

ثم آخذ القطعة وهذي الحركة ضروري أسويها تضمن لي الاستواء + تحافظ على قوام القطعة ما تهبط من النص
إذا بدأت تبرد ..
الحركة هي أكون مشغله الفرن من تحت على درجة 180 ْ ثم أحط القطعة على شبك حديدي تحته الصينية أو على الصينية نفسها لو ماعندك شبك بس الافضل تكون بدون حواف مثل / صواني الكوكيز ..
و أخليها من 5 – 8 دقايق و أطلعها و أقدّمها مع أي صوص كلن و إبداعه 😍

تعمدت ما أحط مع الخليط سكر أو أي مكون محلّي عشان السكر المكرمل عليها بيعطيني حلاوه + الكاراميل اللي بأضيفه 👌🏻

و أحياناً أرش عليها سكر بودرة .. ونقدر نبدّع بأن نحشيها ونضيف معها الاضافات اللي نحبها و بألف عافية على قلوبكم 🤍✨

* الوصفة سهلة جداً بس تعمدت أكتب كل التفاصيل اللي سويتها عشان تضبط من أول مره بنفس الطعم والقوام اللي توصلت له 👌🏻