اسرار نجاح الكوكيز 👌🍪
.
*قبل عمل الكوكيز ضروري نلتزم بالتالي:
١- البيض بحراره الغرفه
٢- الزبده بحراره الغرفه .. وغلط غلطط نذوب الزبده!! الزبده ضروووري تكون بحراره الغرفه بس بارده يعني لينه على بارده شوي مو يابسه ولا ذايبه!
٣- السكر الاسمر لازم يكون نوع اللي ملزق مو نفس سكر الابيض ناشف ، و راح احط صورته بعد شوي وفي منه نوعين فاتح وغامج والافضل للكوكيز الفاتح (لايت) .. ونوع هالسكر الاسمر اهو اللي يعطي الكوكيز لون اسمر حلو عكس السكر الاسمر الناشف اللي يخلي الكوكيز لونه سكري على ابيض.
٤- السكر الابيض افضل تكون حبيباته ناعمه مو خشنه ، وانا افضل ماركه مركز سلطان او SIS وانتبهوا يكون حبيباته ناعمه وليس سكر ناعم مطحون!
٥- نشغل الفرن قبل لا نسوي الكوكيز عشان ياخذله وقت ويسخن الفرن قبل دخول الكوكيز ، يعني نقدر نقول نشغل الفرن قبل لاندخل الكوكيز بربع ساعه تقريبا.
٦- نشغل الفرن من تحت فقط وعلى حراره ١٨٠ سيليزي او ٣٥٠ فهرنهايت ، والرف نحطه بالوسط.
٧- الفانيلا السائله مقدارها يختلف عن الفانيلا البودر ، وانا كلللش ما احب البودر ، السائل جدا افضل .. و زياده الفانيلا تطلع مروره.
٨- ضروري حق كل الحلويات مو بس الكوكيز استعملو اكواب القياس (كوب ، نص وثلث و ربع كوب) ، وايضا الملاعق القياسيه! لا تستخدمون قلاص الجبن وتقولون ماضبط معاي لان كل قلاص جبن قياسه يختلف عن الثاني!
.
*بعد الانتهاء من عمل خلطة الكوكيز:
١- نكور الكوكيز كور صغيره تقريبا قياس ملعقه ونص كبيره او ملعقتين كبيره.
٢- نضع كور الكوكيز في صينيه الفرن ونترك بين كل كره والاخرى مسافه صبعين او ٣ اصابع.
٣- الكوكيز فيه زبده فمو ضروري نحط ورق الفرن (او الشمع) على الصينيه لان ماراح يلزق ، بس انت افضل ورق الفرن لان الكوكيز ينشال بسرعه.
٤- ندخل الكوكيز الفرن لمده ١٠ او ١١ دقيقه فقققط مو اكثر .. اهو شكله راح يكون مو مستوي من فوق بس طلعوه لان راح يكون من تحت متحمر ، ونخليه برا يرتاح ١٠ دقايق بالصينيه وتالي راح يتغير شكل الكوكيز ويصير شكله مستوي وتالي نرفعهم من الصينيه.
٥- واذا تبونه يبرد بسرعه حطو الكوكيز بعد مايتغير شكله على رف الشبك (اسمه بالانجليزي واير راك).
٦- ويحفظ الكوكيز في علبه مغلقه باحكام ، مثل (التابروير). والوصفه منزلتها من قبل بس راح انزلها الحين بصوره ثانيه ومع الطريقه .. وللعلم هذا ككاو جالكسي مو نوتيلا.
.
واتمنى اكون افدتكم بهالتعليمات 💞 #CookiesMiniBaker
