بسبوسة محشيه قشطه

| بسبوسة محشيه قشطه | 😍✨

الصراحه مو لذيذه وبس خطيررره مره و القشطه متماسكه تهبللل 😋👌🏻 جربوها واحكمو ، الطريقه ما أعرف لمين بالضبط ناسيه القناه أو الحساب بس اتذكر عجبتني
و كتبتها بالتفصيل عندي 🙊

المقآدير السآئله / كوب ماء + اصبع زبده ذايبه + ربع كوب زيت + علبة زبادي نخلطهم مع بعض ثمن نضيفهم ع المقادير الجافه .

المقآدير الجآفه / كوبين ونص سميد ناعم + نص كوب جوز الهند + كوب سكر + ربع ملعقه صغيره بيكنج صوديوم + ربع ملعقه صغيره ملح + ملعقه ونص صغيره بيكنج بودر ، نخلطهم مع بعض و نضيف عليهم المقادير السائله ثمن نقسم الخليط لقسمين متساويين .

نجيب صينيه متوسطة الحجم إذا تبونها عريضه وإذا تبونها رفيعه استخدمو الصينيه الكبيره ..
نفرد القسم الأول بشكل متساوي بعدين نضيف القشطه بالقمع ونترك مسافه بسيطه من الأطراف عشان تكون أرتب في الشكل بعدين نضيف الباقي من الخليط بكيس التزيين بدون اضافة ماء ولا حليب ونبدأ بشكل مرتب نغطّي القشطه بالكامل وبعدين نرتبها ونواسيها بالملعقه وندخلها الفرن بالرف الوسط ونشغل النار على درجة حراره 350 فهرنهايت ( انتبهو البسبوسه مانشغل الفرن من قبل زي الكيكه لا البسبوسه تختلف إذا دخلناها نشغل عليها ) جلست معي تقريباً 20 دقيقه وبعدين حمرتها خفيف من فوق وأول ماطلعت سقيتها بالشيره وغطيتها ترتاح لين تبرد بحرارة المطبخ بعدين إذا تحبون تدخلونها الثلاجه أو تزينونها على حسب ذوقكم وتقدّمونها ..

وعسآها بألف ألف عافيه على قلوبكم يارب 💜✨

. ** مكونات الحشوه عباره عن :-

4 أكواب حليب سايل ( المراعي ، نادك .. الخ )
+
12 حبه جبن كيري بحرارة المطبخ وهرسته بالملعقه عشان يصير ناعم بسرعه يتجانس مع الحليب .
+
ثلاث أرباع كوب سميد ناعم .
ع النار نخلطهم مع بعض ( وإذا حبيتو تضيفون نكهات ماء ورد أو زهر أو فانيلا سائله أو بدون أفضل ) ونخلط لين يصير عندنا القوام كريمي ومتماسك وبعدين نحطه بصينيه وسيعه ونحط ع الوجه مباشره التغليف النايلون عشان ما تتكون ع السطح قشره و نحفظها بالثلاجه لين تبرد وتتماسك ثمن نستخدمها للبسوسه والكنافه والقطايف اللي تحبون .

#بسبوسة_عبير_العميره