| ورق عنب بقدر الضغط الكهربائي |
* راح أشرح بالتفصيل :
أول شيء قطعت البصل شرائح وصفّيته بعدين شرائح طماطم بعدين وزّعت أورآق نعناع وعليه فلفل حار حبات كامله تعطي نكهة لذيذة ، وممكن إضافة شرائح جزر أو بطاطس
على حسب الرغبة ..
بعدين أخذت لي 3 فصوص ثوم دقّيتها مع شوي زيت زيتون + عصير 3 حبات ليمون + فلفل حار مجروش + نعناع مجفف + شوي دبس رمّان حرّكتهم مع بعض وأضفتهم على شرائح البصل والطماطم . .
* الحين نجي لورق العنب جرّبت أنواع كثيره
يفوز عندي بالدرجة الأولى : ( قلب الطبيعة )
ورقته خضراء وخفيفه تهبل ولافيه عروق تغث !
صح بعض الورقات تجي صغيره بس عادي تقدرون ترقعونها فوق بعض وتضبط 👌🏻بس مشكلته ماتحصلونه بسرعه ☹️ آخر مره خذيته من التميمي و تحصلونه
أكيد عند محلات الشام حي السليمانية عند أبو الهوس .
أول ما أفكه أطلعهم وأحطهم بشبك أفرّقهم عن بعض وأصب عليهم مويه عاديه يروح عنه الملوحه والمواد الحافظه ونخليه على جنب .. .
** نجي للحين للحشوة :
– المقدار اللي راح أكتبه لعلبه وحده ..
أربع أكواب رز مصري استخدمت ( صنوايت ) أغسله وأصفيه من الماء وبعدين أجيب تاوه وسيعه : وأقطع بصله تكون متوسطة الحجم تقطيع ناعم وأضيف عليه كمية حلوه من زيت زيتون تقريباً ربع كوب وأحركه لين يذبل وبعدين أضيف الرز وأضيف عليه : ( ملح ، فلفل أسود ، فلفل أحمر مجروش ) + نص كوب طماطم معلّب مطحون ناعم عشان لونه وطعمه أفضل من الصلصة وإذا ماعندك أضيفي صلصة مو مشكله .. ونحرّكهم مع بعض بسرعه على نار هادئة وآخر شيء نضيف :
( ربع كوب بقدونس وكزبره مفرومه ، شوي شبت مفروم ( اختياري ) ، قبضة اليد ورقات نعناع مفرومه ، عصير ٤ليمونات ، ونقلبهم مع بعض ونطفّي النار بدون ما يستوي .
. ** نحشي ورق العنب ونوقفه زي ماتشوفون بالصور جنب بعض عشان مايطلع الرز وبنفس الوقت يصير مانحتاج نحط عليهم صحن يضغط 👌🏻 .
** آخر شيء نصب عليهم الخلطة :
نص كوب زيت زيتون + نص كوب دبس رمان + نص كوب عصير ليمون + م ك بهارات بيضاء يكون طعمها لذيذ بديل للماجي + ماء مغلي بحيث نغطّي ورق العنب ونقفل عليهم الغطاء ونضبط المدّة بالجهاز ياخذ 45 دقيقة وآخر مره خليته ساعة كاملة طلع زبدة يذوب بالفم ، لمن يخلص نفتح الصمام ونخلي البخار كله يطلع ولا نفتح الغطاء أبد لين يبرد تماماً .
** سر لمعة الورق العنب :
لمن يستوي مانفتح الغطاء نهائي نتركه يبرد عن مايقل من ٤-٥ساعات وأفضل شي تسوونه بالليل ومن بكره ترتبونه بالطبق ونصفّي المويه اللي بقت من القدر ونرجع نصبها ع الورق حتى يحتفظ بطراوته وطعمه ولونه الزاهي ،
وبألف عافيه عليكم حبآيب قلبي ❤️
#قدر_الضغط_اديسون_عبير_العميره
