《انشيلاد بشاورما اللحم》
اهي بالاساس وصفة مكسيكية .. بس مايمنع نحط فيها التتش بتاعنا 😂🙈
سويتها بشاورما لحم جاهز ومتبل للسهوله والاضافات كانت من راسي بس اوعدكم انها ناطعه وطعم متجانس و #لذيذة_لذاذة_اللذوذين_كلهم😋👌
المقادير
- علبة شاورما لحم او دجاج كيفكم (انا ستخدمت لحم المواشي)
- كيس خبز تورتيلا
- كوب جبن تشيدر
- كوب جبن موزاريلا
- نص كوب كريمه حامضة (انا حطيت لبنه)
- طماطم فرم ناعم
- حطيت خرشوف معلب خطييير وطبعا اختياري خذيته من معرض الغذاء من ام اف
- فلفل بارد اخضر وبرتقالي
- بصل فرم ناعم
- ثوم فرم ناعم
- معلقة كبيرة او اكثر طحين
- 2 كوب ماء او على حسب سماكة الصلصة المطلوبه
- مكعب مرقة دجاج (استخدمت ماجي وممكن الاستغناء عنها كيفكم)
- صلصة او معجون طماطم
- كاتشب
- بودرة فلفل حار او بابريكا
- زعتر بري و روزماري
- ملح فلفل
#انشيلاد_كلحه #وصفات_كلحه
طريقة التحضير
🔹️بالقليل من الزيت نقلب البصل والثوم والفلفل البارد لمن يذبلون عدل مدل
🔹️انزل عليهم الشاورما واقلب الجميع .. نزلت عليهم شوية كاتشب (يعطي حموضه ونكهه) وشوي بابريكا ونقلبهم
🔹️نزلت الطماطم والخرشوف وتقليبة خفيفه ورفعت الشاورما عن النار
🔹️بنفس المقلى حطيت زبدة وطحين وقلبتهم لمن اشقر الطحين نزلت مكعب مرق دجاج وماي وحركت لمن تجانس
🔹️نزلت اللبنة ومعجون الطماطم وتبلت بشوي ملح وفلفل واعشاب عطرية وبسسس
◾لتطبيق الطبق:
🔹️سخنت خبز التورتيلا وهالشي اختياري وحشيتها بالشاورما وصفيتهم بطبق الفرن (طبعا حطيت من الصلصة تحت السندويشات)
🔹️صبيت باقي الصلصة فوق السندويشات وعالوجه تشيدر ومزاريلا وعالفرن من تحت فقط لمن تسبكت تمااام واشعلت فوق تتحمر وبالعافية 😊👌🏻
⚠️ هالمقلى المستخدم نوع سكان بان scan pan من تافولا مانع التصاق ومايتزلغ ابداااا وسهل التنظيف
#٢٠١٨_كلحه
