| . Pecan Bars . بيكان بار |
رهيب و سهل و الطّعم لا تعليق ، أكيد واضح لكم من كثر ما مدحته لكم اليوم 🙊 .
.
. الطبقة الأولى .
اصبع ونص زبدة غير مملحة باردة من الثلاجة مقطّعه مكعبات نخلطها مع نص كوب سكر أبيض .
( إذا ودّك تحطين ربع كوب أبيض وربع كوب أسمر
بدال ما تخلينه كله أبيض عادي ينفع )
لمن يمتزجون مع بعض الزبدة والسكر ننزل عليهم
ملعقة صغيرة فانيلا + قشر برتقالة ( تقولين والله
ما أحب القشر عادي أحذفه ؟ .. ايه عادي )
+ بيضة حبه وحده .. عشان خاطري لاتقولين بأحذفها !
ضعيفه هالحبه ماراح تسوي لك شيء 🥺
بتقولين يمكن تطلع زخمه !! أنا ودي أتعرف على هالزخمه اللي ذابحتكم خافو الله فيها حبه وحده ومعها فانيلا وقشر برتقال يعني حتى لو فيها زخمه بتستحي تطلع لكم هالزخمه 😬 .
طيب الحين اختلطو هالأشياء مع بعض ننزل عليهم :
كوب ونص طحين متعدد الاستعمالات + نص م ص ملح ، بس مجرّد يندمج الطحين نوقف . .
.
نفرد العجينة في صينية مربعة 9*9 انش نحط فيها
ورق زبدة أفضل ونفرد فوقه العجينة ثم ندخلها الثلاجة أو الفريزر إذا مستعجله أبيها تتماسك الزبدة اللي فيها إذا تماسكت بالشوكة سوّي فتحات عشوائية وتدخلينها فرن ساخن مشغل من تحت على درجة 180ْ بالرف الوسط تاخذ من 20 – 25 دقيقة بتشوفين الأطراف خذت لون التحمير الحين نطلعها من الفرن ..
.
ونكون مجهّزين . الطبقة الثانية .
بقدر ع النار / اصبع زبدة 100 جرام + كوب سكر بني
نذوبهم مع بعض اذا اندمجو نضيف م ص فانيلا + م ك كريمة خفق أو حليب ونستمر في الخلط ونشيله من على النار ونضيف ثلث كوب عسل .
” العسل ياعسل يحتاج يكون طعمه خفيف ولذيذ ”
بتقولين ينفع شيره بأقولك لاااا ! لأن الشيره عباره عن سكر وحنا حاطين بمافيه الكفايه يعني ماينفعش 🤪
الخلطه هذي وهي دافيه نصبّها على ثلاث أكواب ونص جوز البيكان حبات كاملة مو مكسّره وكل ماكانت الحبّات كبيره ولذيذه استطعمتي اللذاذه الصدقيه يعني خذي لك نوع فآخر إذا قالك هذا أمريكي فاخر مو تقولين عطني على طول لا قولي عطني كم حبة واستطعميها بنفسك 👌🏻.
.
ثم ندخلها الفرن مره ثانيه 20 – 30 دقيقة نفس الطبقة الأولى لا تشغلين من فوق من تحت فقط ، ثم خليها تبرد الصينية بأجواء المطبخ ثم دخليها الثلاجة أقل شيء ساعه تتماسك زين .. وعند التقطيع يبي لك سكينة طويلة حادّه 👌🏻 وعلى راحتك تبين التقطيع يكون مستطيلات أو مربعات ..
.
.
. * معليش تحمّلو البربره الواجده ترى أحب أشرح بالتفصيل عشان فيه بنات مبتدئات يحتاجون هالتفاصيل .. و هني و عافيه على قليباتكم ♥️
.
.
