وصفه كيكه الحليب بالزعفران .. الوصفه اخذتها من صديقتي راويه 😍 @rawya_
انا بس شرحت زياده بالتفصيل وغيرت مقادير خليط الحليب وضفت عليها وصفه الكريمه.
تهبل الوصفه ماشالله وبااارده تسرسح عقب الفطور ضروري تجربونها والشكر موصول لصاحبه الوصفه راويه💓
.
مقادير الحليب:
٢ كوب حليب طازج
٢ علبه حليب مبخر ١٧٠ جم
٣ علبه صغيره حليب مركز محلى (٩٠ جرام الواحد)
.
المقادير الكيك:
٥ بيضات
١ ملعقة صغيرة فانيلا سائله
١ كوب سكر ابيض
١ و ٢/١ كوب طحين
١ ملعقة صغيرة بكينج باودر
١ ملعقة صغيرة ملح
١ ملعقة صغيرة هيل مطحون (اختياري)
١٢٥ جرام زبده (صبع كامل+ربع صبع) ، مذابه
.
مقادير الكريمة:
٤/٣ كوب كريمه خفق سائله
١ و ٢/١ ملعقه كبيره سكر مطحون
١ ملعقه صغيره ماء ورد ***
اول شي نجهز خليط الحليب عشان ياخذ نكهه ولون الزعفران عدل. في جدر او قدر وسط نخلط كل المكونات ونضعه عالنار وبعد مايسخن نرفعه من النار ونغطي ونخليه على جنب. (ضروري تسوونه اول شي عشان يعطيكم لون الزعفران قوي ماتحتاجون تحطون صبغه)
.
نسخن الفرن على حراره ١٨٠ سيليزي او ٣٥٠ فهرنهايت. الرف يكون بالوسط والحراره من تحت فقط. مع مروحه او من غيرها نفس الشي.
نجهز ٢ قالب دائري ٨ انش ونرشه ببخاخ الزبده ونضع بالوسط ورق زبده او ورق البارشمنت .. ممكن تستخدمون قالب واحد بس يكون اكبر من ٨ انش.
.
في العجانه او المسكر او الخلاطه اليدويه، نخلط البيض والفانيلا والسكر حتى يصير كريمي ، تقريبا ٣ الى ٥ دقائق. (انتبهوا ان خلط مو خفق يعني ماتستخدمون اداة المشبك).
في وعاء وسط، نخلط المقادير الجافه: الطحين والملح والبكينج باودر والهيل.
نضيف المقادير الجافة تدريجياً على خليط البيض
ثم نضيف الزبدة المذابه ونخلط الى ان تمتزج المكونات.
.
نقسّم الخليط على القالبين. ندخلهم الفرن لمده ٢٠ الى ٢٥ دقيقه اذا القالب ٨ انش. اذا كان القالب اكبر ممكن ياخذ وقت اكثر (الوقت حسب حجم القالب).
بعد مانطلع الكيك من الفرن نخليه يبرد بالقالب ١٥ دقيقه. تالي نطلع الكيكه من القالب ونقص انتفاخ الكيكه من فوق عشان تصير متساويه. نسوي ثقوب بالكيكه باستخدام الشوكه ونسقيها بالحليب. (الكيكه راح تكون حاره شوي والحليب بحراره الغرفه). تالي ندخلها الثلاجه حتى تبرد.
بعد ماتبرد الكيكه نجهز الكريمه.
.
عشان تضبط الكريمه معاكم: لازم كل شي يكون بارد (الطاسه واداة المشبك والكريمه) حطو الطاسه والاداة بالثلاجه قبل ١٠ دقايق او اكثر. نخفق جميع المكوناات على سرعه عاليه الى ان يتضاعف حجمها وتصير صاكه وثقيله. (عشان تعرفون انها اضبطت راح تشوفون تصير خطوط بالكريمه من المشبك خلال الخفق)
#ramadan
