ام على
النهاردة هنعمل حلو .. اصيل و بيحتوى البنى ادم و نادراً لما تلاقى حد مبيحبوش، هنعمل ام على اللى كل ما تكلفها كل ما تبقى احلى .. يلا بينا.
المقادير
- ٨ مربعات باف بيسترى
- ٢ كوب لبن
- كوب كريمة
- علبة لبن مكثف محلى
- باكو ڤانيليا
- نص كوباية جوز هند
- نص كوباية زبيب
- نص كوباية بندق
- نص كوباية فسدق
- قشطة
طريقة التحضير
هنجيب الباف بيسترى و ندهنه بالبيض و ندخله الفرن لحد ما ينفش و ياخد لون.
فى حلة هنسخن اللبن مع الكريمة مع اللبن المكثف المحلى و الڤانيليا لحد ما يغلوا.
فى الطاجن بقى هنكسر الباف بيسترى و نحط المكسرات و جوز الهند و الزبيب و ننزل عليهم بخليط اللبن و نختم بالقشطة على الوش.
بديل الباف بيسترى كرواسون او ميلفيه من اى محل حلوانى.
ندخل الطاجن فى الفرن ربعاية بعد كدة نشغل الشواية لحد ما الوش يحمر.
هتاكلوا ساعتها احلى طاجن ام على فى الكوكب، ام على من الحاجات اللى بتعتمد على الذوق الشخصى، ممكن تحطوا خليط اللبن اكتر او اقل و كذلك المكسرات، حاجات كتير حسب الرغبة … جربوا طاجن أم على الخطير ده و قولوا لنا رأيكم 😍😍😍
