《فطاير قوجير الفرنسية》🇫🇷
.
او كما تنطق قوجييغ 😌🇫🇷 المهم هي نوع من الفطاير اللي نسويها بطريقة عجينة الشو والكلير وهي تعتمد على اننا نذوب الزبدة والسوائل عالنار بعدين نضيف الطحين والبيض .. وكل وصفه مقاديرها مختلفه لكن بنفس المبدأ
.
القوجير .. غالبا يسوونها باللحم المقدد والثوم يحمسونهم عالنار وبس يبرد ينخلط بالعجينه وتخبز .. وهالشي اختياري بس اللي مو اختياري وأساسي هو اضافة الجبنه
.
والمطلوب جبنة طعمها حاد وواضح مثل كومتي .. امنتال .. سويس تشيز .. وغيرهم واللي مايحصلهم (مع اني متاكد بتلاقونهم بالهايبر ماركت) يقدر يحط تشيظر وبارميزان وأمركم لله😏
.
◾المقادير:
.
🔸️٧٥ جرام زبدة (ثلاث ارباع اصبع)
🔸️نص م.ص ملح
🔸️كوب ماء (ممكن نخليه نص ماء ونص حليب)
🔸️١ كوب طحين
🔸️٣ حبات بيض
🔸️١ كوب جبن (انا استخدمت جبنة صفرا هولندية)
.
◾الطريقة:
.
🔹️على النار نذوب الزبدة والملح والماء وبس يذوبو تماما نطفي النار ونضيف الطحين ونخلط بالملعقه جق جق جق
.
🔹️بس يتجانس نشعل النار ونخليه مع التحريك المستمر دقيقتين
.
🔹️نرفعه عن النار ونحطه بطبق ثاني نظيف ونقدر نكمل باستخدام المضرب الشبكي (بس انا حطيتها بالماكينه .. الصراحه مالي خلق اخلط باليد بس ركبت مضرب التقليب موو الشبكي) 🙈
.
🔹️بس برد شوي و راح منه البخار .. شغلت المكينه واضفت البيض حبه حبه مو مرة وحده وبين كل بيضه وبيضه نتأكد انها اختفت وتجانست
.
🔹️بعدين نضيف الجبن .. وانا اضفت شطه مجروشه وبابريكا وبودرة ثوم وزعتر ورق ناشف وخلطت الجميع ترررررررررر
.
🔹️على صينية مبطنه بورق زبدة .. وباستخدام ملعقه الايس كريم حطيت كرات بعيدة عن بعض
.
🔹️دهنتهم بخليط (صفار بيضه+ملعقتين ماء)
.
🔹️دخلتهم فرن محمي مسبقا حرارة ٢٠٠ والصينية بالوسط … وبس اشقر من تحت طفيت الفرن وشغلت الشواية من فوق وحمرتهم شوي
.
🔹️طلعتهم وعلطول هم وساخنين دهنتهم بخليط (زبدة وثوم مدقوق وكزبرة) وبالعافية 😊👌🏻
.
.
#فطاير_كلحه #محمد_الكلحه #قوجير_كلحه
.
.
#٢٠١٨_كلحه
