على طريقة ردينه الزامل :
كتف خروف ينسلق ساعتين ونص مع المطيبات (بصلتين مقطعين ارباع، بهارات صحيحة مثل الدارسين، الغار، الهيل، اللومي والمسمار) و من دون ملح
ينرفع اللحم من الماي و يندهن بمنقوع الزعفران، ماي ورد، ملح، دارسين و هيل بودر و يتحمر بالفرن او بالزيت
للحشو بصل مكعبات كبيرة تنحمس على النار من غير زيت او شي بس تتحمر على نار عالية تالي نصب ماي عشان يتغير لون البصل و يصير بني بعدين نصب الزيت، فوقه النخي والكشمش المنقعين (زبيب و حمص مجروش)، ملح و فلفل و دارسين و هيل
نرفع ثلاث ارباع الكمية و ننزل العيش البسمتي مغسول و منقع و فوقه ماي فوح اللحم، مع اضافة ملح لان مافيه، و سمن و هيل بودر
قياس الماي صبعين ارفع من منسوب العيش، تالي على النار الهادية او الحديدة الي توزع الحرارة لما يخف الماي كله
عقب نصب الزعفران و يكون اللحم جاهز والحشو
الدقوس (صلصة الطماط الكويتية) ينطبخ الثوم على الزيت بدون لا يتحمر بس خل تطلع ريحته، معجون الطماط، ملح و فلفل بعدين الطماط المقطع فوقهم، و ممكن نضيف شوية ماي اذا حسينا ان القوام ثقيل ، و يطبخ على نار هادية
مچبوس اللحم جاهز 🔥 جداً لذيذ اللي ما يعرفه لازم يسوي هالطريقة بالضبط و يستمتع بالاكل الكويتي 👌🏼 سهل لكن ياخذ وقت عشان يستوي اللحم
