الوصفة مضمونة وناجحة مية بالمية
اتمنى كلكم تجربونها الكمية حلوه مو مره كثيره
تقريبا ٣٨ كعكه 👌
الريحة والطعم خيال ❤️❤️
المقادير
ثلاث اكواب دقيق
رشة ملح
ملعقة ك شمر وملعقة ك يانسون وملعقة ص محلب وملعقة ك سكر (اطحنهم كلهم مع بعض )
واضيف ع الدقيق ملعقتين ك منهم
ملعقتين ك سمسم محمص (حمصوه كثير)
ملعقة ص حبة سوداء (محمصه)
في قدر ع النار نص كوب زيت (لو تبغون تضيفون زيت زيتون ممكن بس انا اضفت زيت عادي)
نص كوب سمن واسخنهم ع النار تسخين بس
مااخليه يغلي ابداً واصبه ع الدقيق وباقي المكونات
واقلبهم بملعقة خشب الين تصير حرارته عاديه
واقلب بيدي وافركهم وهذي اهم خطوه
واضيف عليه نص ملعقة ص بكنج بودر
وبصحن نص ملعقة ص خميرة عليها نص كوب ماء دافي واقلبهم واعجن فيهم وننتبه لطريقة العجن
بس تقليب بالاصابع مو عجن قوي ابداً
ورجعت كمان اضفت ربع كوب ماء عادي واكمل تقليب تطلع العجينة لينه
واغطيها ترتاح ٢٠ دقيقة
نسوي حشوة التمر :
تمر معجون عليه ملعقة زبده او سمنه
وهيل مطحون (ممكن تضيفوا قرفه انا مااحبها مع التمر ومااضفت)
ونضيف كمان من بهارات المعمول اللي طحنتها
واعجنهم واشكلهم اصابع للحشوة
ونحشيها ونقفلها مزبوط حسب الحجم اللي تبغوه
وبالصينية اتركها ترتاح عشر دقايق وبعدين احطها بالفرن مسبق التشغيل حرارة ١٩٠ مدة عشرة الى ١٢ دقيقة الحرارة من فوق وتحت مع بعض وشوفوا كيف درجة التحمير اللي تبغوها
بس حاولوا لاتخلوها عريضة مره شوفوا كيف حجمها بالفيديو حلاتها تكون خفيفه 👍🏻
