الهريسه بطريقتنا متل ما علمتنا ياها ستي الله يرحمها و يرحم اموات الجميع . .
( الطريقه : كانت ستي الله يرحمها تغسل القمح المقشور اكتر من مره لينضف بعدين تحطو بالطنجره مع المي و تولع الحطب ٤ ساعات بيستوي بذوب ذوبان ببلشو يهرسو بمعالق الخشب بطرو القمح بمرق اللحم و الدجاج لتخلص كمية المي ويطرى القمح بعدين بضيفو اللحم و الدجاج المسلوقين و وكمان بمعالق الخشب بحركو و بدقو و بيهرسو اللحم والدجاج مع القمح ليسير يشلخ متل كانو في جبنه كانت ستي تعمل السمن على ايدها بلدي و تقطع الليه قطع صغيره لية الخاروف و تذوب الليه عالنار تصفي الليه تحط الزوم مع السمن و تسخنن و تحطن هني و سخنين عالهريسه بتحرك و بتضيف قرفه ( درسين) و بتسكب الهريسه — يلي ما عندو سمن بلدي يحط سمن البقره الحلوب .
كانت الله يرحمها تعمل الهريسه بطنجره كتير كبيره عالحطب ونحنا نساعدها خالاتي و الاحفاد كلن .
كانت الف رحمه لروحها تقسم الشغل علينا كلنا خالتي الاشياء المهمه متل السلق و فصفصة اللحم و الدجاج و تحريك الهريسه بمعالق الخشب ونحنا نركض نجيب حطب من الحكوره ( الحديقه ) و نحطن عند الموقده .
بس يحطو اللحم و الدجاج عالقمح يجي دور الهرس بمعالق الخشب الطويله ونحنا نطلع ونط لنشوف كعب الطنجره الكبيره .
ويحكولنا روحو من هون 😂 كانت مهمة الاطافيل ما كنا اطافيل يعني اعمارنا بال ١٣ لل ١٧ انو نوزع صحون الهريسه عكل بيوت الحي .
نحط الصدر عراسنا و نمشي وكنا نكون ٢ كل ٢ معن صدر عشان واحد يحمل وواحد ينزل الصحون ندق عباب الجيران مرحبا هودي من ستي ام كامل .
يكيفو عالصحن الحي كلو ينطر ستي وقت كانت تعمل وتوزع كل سنه الله يرحمها عمدار عشرات السنين .
ننطر عالباب ليرجعو الصحن نحط الصحون الفاضيه عالصدر و نركض لعند بيت ستي لنعبي دفعه تانيه .
الصحون كانت زجاج مرتبه و كان في كيس صغير من الدرسين مع خاله من خالاتي نحمل الصدر و ناخدلا يا ترش القرفه هيدي آخر لمسه عصحن الهريسه .
بس نخلص التوزيع منجمع الصحون و كل الطناجر و المعالق عند البركه يلي صورتلكن ياها ببيت ستي ويتساعدو الكل عالجلي .
بعد الجلي لازم نشطف المسطبه ( مكان الشغل ) .
المسطبه كانت من مصبوبه من الباطون تحت التينه ستي الله يرحمها كان عندها اكبر شجره تين بالضيغه عمرها من اكتر من ١٥٠ سنه .
المقادير
- كيلو قمح مقشور
- كيلو ونصف دجاج مسلوق
- كيلو ونصف لحم مسلوق
- ٢٠٠ غرام لية خاروف
- كوب ونصف سمن
- ملح
- قرفه
