أحدث الوصفاتالحلويات

تارت مانجا

تارت مانجا

النهاردة هنعمل اقوى و اسهل تارت مانجا 🥭 حاجة كدة طعمها خيالى و سهلة و مكوناتها متوفرة …. يلا بينا

(مقادير طبقة البسكوت)

  • ٣٠٠ جرام بسكوت مفروم
  • ١٠٠ جرام زبدة سايحة

و هنخلط البسكوت بالزبدة و نحطهم فى قالب التارت و نضغط جامد و نعمل اطراف، بعد كدة ندخلها الفريزر علشان تمسك لمدة نص ساعة.

هنجيب بقى المانجا و نقطعها شرايح رفيعة و فى مانجا هتبقى شوية مهرية دى خليها على جنب هنخلطها مع الكريمة.

(مقادير الكريمة)

  • ١٠٠ جرام جبنة كريمى
  • علبة قشطة
  • نص علبة لبن مكثف محلى
  • باكو كريم شانتيه
  • ٥٠٠ مل كريمة خفق

هنضرب الكريم تشيز الأول مع المكونات القشطة و المكثف المحلى و الكريم شانتيه و الكريمة لحد ما القوام يظبط نقوم حاطين براقى المانجا اللى اتهرت مننا و نقلبهم كلهم مع بعض.

نحط الكريمة على التارت بتاعنا و ندخلها التلاجة نص ساعة برضه.

نبدأ بقى لما نطلعها نزوق بشرايح المانجا لحد ما تبقى عاملة زى الوردة كدة 😍 هنجيب بقى چيلى مانجا نديله نص كوباية ماية سخنة و نص كوباية مياه ساقعة و ندهن الچيلى على المانجا من فوق و ندخلها التلاجة على الأقل ساعتين.

بعد كدة بقى نطلعها و نقدمها و ناكل احلى و اجمل و اسهل تارت مانجا 🥭 يا جماعة حقيقى طعمه مالوش حل 😍😍 حقيقى لازم تجربوه و تقولوا لنا رأيكم 😍

المصدر: @muhammedhazem

5/5 - (2 صوتين)

Mohammed Hazem

- TikTok Hero Award 2020🥇(Best food content 2020 middle east) - Cook/food blogger ‎- مرجع المطاعم - Lotus king‎- #بشاميل_الخميس - Burgers Addict

اترك تعليقاً

زر الذهاب إلى الأعلى