أحدث الوصفاتالحلويات

برازق شامية

برازق شامية

افخم برازق شامية بلونها الذهبي اللامع وقرشتها وطعمها المميز مع تكبيرات العيد من الجامع الاموي😍

بوعاء بنضيف نصف كيلو طحين (ثلاث اكواب ونصف معياري حجم الكوب ٢٥٠ مل) مع كوب سمنة بحرارة الغرفة

بنفركهم منيح لتصير عنا عجينة طرية بندخلهم الثلاجة من نصف ساعة لساعة

بهالاثناء بصحن بنضيف كوب سكر وربع كوب قطر ونصف كوب ماء ومعلقة صغيرة محلب بنحركهم منيح

بعد ما نطلع العجين من الثلاجة بنضيف عليهم خليط السوائل حتتشكل عنا عجينة لينة حتتماسك بعد ما نحطها مرة ثانية بالثلاجة لمدة نصف ساعة وممكن نخليها لثاني يوم

لخليط السمسم ( ثلاث اكواب سمسم محمص بنضيف عليهم ثلاث معالق قطر وثلاث معالق ماء كبار ومعلقتين كبار سكر ) وبنفركهم لتطلع ريحة السمسم.

بنطلع العجين من الثلاجة بنوخذ قطعة وبنطريها كثير منيح وبنقطعها لقطع صغيرة (الحجم من اختياركم) بنغط اتجاه بالفستق الحلبي والوجه الثاني بالسمسم وبنحطهم ع صينية خبز

بنخبزهم ع حرارة ١٨٠ بفرن محمى مسبقا لمدة ١٠ دقايق وبنحمرهم دقيقتين من فوق وبنتركهم حتى يبردوا تماما لانهم بكونوا طريين

وبالعافية ع قلبكم.

قيم هذه الوصفة
زر الذهاب إلى الأعلى