أحدث الوصفاتالساندوتشات والمعجنات

بابكا الزعتر باستخدام عجينه البريوش

وصفة بابكا الزعتر باستخدام عجينه البريوش💚

وصفه البريوش:

  • (٤٥٠ جرام) او ٣ونص كوب طحين الخُبز
  • (٦ جرام) او ٢ ملعقه شاي خميره
  • (٣٧ جرام) او ٣ ملاعق طعام سكر
  • ٢/١ ملعقه شاي ملح
  • (٢٢٥ جرام) او ٤ بيض كبير ، مخلوطين
  • (١١٥ جرام) او ٢/١ كوب حليب سائل دافئ (حرارته بين ٩٠ لي ١٠٠ فهرنهايت)
  • (٢٣٠ جرام) او ٢وربع اصبع زبده غير مملحه ، بحراره الغرفه (حرارتها بين ٦٥ لي ٦٧ فهرنهايت)

خلطه الزعتر (هالكميه لنصف العجينه):

  • ٤/٣ كوب زعتر
  • ٢/١ كوب زيت زيتون
  • ٢ ملعقه صغيره سماق
  • ١ ملعقه كبيره دبس رمان

هالوصفه تعطينا ٢ بابكا

-في وعاء العجانه وباستخدام اداة العجن نخلط الطحين والخميره والسكر والملح ، وبعدها نضيف الحليب ونخلطه قليلا ثم نضيف البيض ونخلط الى ان تمتزج المكونات على سرعه بطيئه لمده دقيقتين. نترك الخليط ٥ دقائق حتى يتطور الغلوتين.
بالعجانه على سرعه متوسطه نضيف الزبده بالتدريج تقريبا على ٤ او ٥ مرات وتالي نخلط زياده ١٠ دقائق او الى ان تكون العجينه لينه ورطبه بس ماتلزق راح تكون وايد ناعمه.
وتقدرون تعرفون اذا كانت جاهزه من اختبار زجاج النافذه شوفوه بقوقل windowpane test

في صينيه مستطيله ندهنها بالزيت ونضع العجينه بشكل مربع وندهن العجينه من فوق بعد وتالي نغطيها بنايلون وندخلها بالثلاجه ٤ ساعات اقل شي او طول الليل (انا افضل طول الليل واخبزها الصبح)

بعد مانطلع العجينه من الثلاجه نقسمها بالنص ونفرد كل وحده بروح.
نفرد العجينه بشكل مستطيل ونخليها نحيفه كثر مانقدر.
نوزع خلطه الزعتر على كل العجينه ونلفها مثل الرول ونلف من الصوب الاقصر عشان تكون عندنا طبقات اكثر. قياس اللي سويتها ١٧ في ٢٠ انش.
في صينيه مستطيله عليها ورق زبده نضع رول البابكا وندخله الفريزر لمده ١٥ دقيقه عشان تكون ماسكه ونقدر نشكلها بسهوله.
بعد الفريزر وباستخدام سكينه حاده او قطاعه البيتزا نقص الرول بالنص من البدايه الى النهايه، وتالي يصير عندنا قطعتين طوال، نخليهم فوق بعض بشكل x وتكون طبقات الزعتر لأعلى. وبعدها نلف القطعتين على بعض من الصوبين مثل ماموضح بالفيديو ويكون عندنا بالاخير مثل شكل الضفيره او العچفه
نحضر قالب مستطيل الحجم بين ٨ لي ١٠ انش حسب المتوفر عندكم. انا جربت حجمين وكان الاصغر احلى بالشكل حجمه ٩ في ٤😍
ندهن القالب بالزيت او ببخاج الزبده ونضع رول البابكا (اذا كان الرول اطول من القالب نلفه على شكل u مثل بالفيديو ونحطه بالقالب)
ونغطي القالب بنايلون ونتركه بحراره الغرفه ساعه ونص الى ساعتين او لين يتضاعف الحجم.

نسخن الفرن مسبقا على حراره ١٨٠ سيليزي من تحت وحديده الفرن تكون بالوسط. تخبز لمدة ٣٠ الى ٤٠ دقيقه

4/5 - (1 صوت واحد)

Kawther AlKusaimi كوثر القصيمي

•Baking is my passion •KUWAIT الكويت
زر الذهاب إلى الأعلى